回帶

(以下乃私人恩怨,不喜勿看)

幾年前玩 newsgroup 年代,假如有人將一件事情 / 人物不斷講不斷講,我o地會稱之為─

「回帶」,意謂有如錄影機一樣,不停倒帶再 replay。

假如有個人唔係好受歡迎,我o地會有個名比佢,叫做「回帶西」。

從前有個「回帶西」,30歲,一事無成,最愛回帶,回來回去,都係回緊有餅帶叫做「初戀女友」,所謂o既初戀女友,仲要係十幾年前o既事,女方結埋婚連仔都生埋,得閒就將呢名阿西點來點去,導致到佢到今時今日都仲存有幻想,可悲也。

早幾年前,有鬼掩著眼睛,小妹有「幸」跟此人拍了年半拖。男人思想幼稚 (e.g. 有餐廳佢去食過,其他人再去,就一口咬定人o地係「跟」佢),終日只顧打機買波鞋玩 newsgroup 沉迷網上世界,毫無上進心,加上性格及各樣東西不合,顧本人提出分手。

分手後,此「回帶西」不斷在外頭發表各式各樣訊息,諸如幸災樂禍呀,數臭呀,男人老狗無風度兼心胸窄如此,哀哉也!

都算。

其實,人不犯我,我不犯人,知你八掛愛偷看我 blog,fine,此乃 un-controlable,但係,唔該你唔好偷睇完人寫o既o野,再o係外邊發表,當係自己o既 idea,難到你 30 歲人連自己的思想也沒有麼?

多謝你o既歷年「厚愛」,我求下你放過我啦!

長大啦,唔該!

feeling so old


昨夜飯局後有感─

‧友人 E 見到我第一句係話:你個樣老o左!
(唉,仆街了!:em_36我唯有賴係因為呢排搬屋事忙累事。)

‧某友人39歲,已經要帶老花鏡 (不過係 Gucci)。

‧飯局後飲o野,行蘭桂坊,我覺得周圍都係o靚仔同埋細路女,同埋真心覺得蘭桂坊好嘈好嘈。

‧最後去o左 fringe club,覺得靜靜地好舒服!(以前最多只係會去聽下 live jazz 然後都即閃再蒲過)

‧有一年無去蒲,覺得蒲呢樣活動十分陌生!(我曾經係逢 party 必到,一個禮拜蒲八晚o既超級蒲精!)

‧12點,開始打喊路!

‧1點返到屋企,覺得好夜!

唉......我其實都仲未過 25 歲生日呀......

(30/3 後按:友人 M 晚上致電誠邀我禮拜五落 Mooch 或者 Volar,我推o左!!!!!!比著兩年前這是十級反常的事情啊~)

--------------------------------

Fringe Club
地址:中環下亞厘畢道2號藝粹會G/F
電話:TBC
菜式:Pub / Bar

香港大學校友會

友人E小姐生日,指定要食中菜,於是,作為大眾娛樂小姐o既我,就訂o左我仲未食過又有o的興趣試下o既香港大學校友會食個飯,難得人多可以試多o的丫嘛~

一行七人,五女二男,全部菜式都係我點o既:em_34

呢度好出名o既古法鹽焗雞 (全隻,需預訂),你無睇錯呀,真係鹽焗雞o黎o架,因為係古法煙燻,我自己就覺得無想像中咁正,但係朋友們就食得好歡喜勁讚。反而我對佢斬埋一齊上o既珍肝雞腎之類十分欣賞,好香口,E小姐話平日唔食雞雜,都睇住佢一舊接一舊咁放入口。

陳皮蒸牛肉餅,又係名物。我覺得「味道rize」o黎講係唔錯,的確好香陳皮味,不過可惜牛肉竟然係山竹果隻梳打牛,o徙晒!同埋無蒸離碟亦都係唔合格,所以全晚係得唯一呢樣o野有食剩。

名物三,杏汁白肺湯,久仰其名,果然好飲到不得了!滑而且香濃!杏味亦唔嗆喉!一飲落去直頭覺得自己無端端靚o左!(我對唔住你呀 F 小姐,打瀉o左你半碗,嗚~嗚~嗚~嗚~:em_45)

上湯芥菜膽,間場用。都唔錯。

名物四 ─ 鮮菇炒生魚卷,鮮菇者即草菇也,的確好鮮,生魚卷唔知捲住o的咩,工序麻煩複雜,可惜,好腥!

名物五 ─ 荷葉飯 (需預訂),巨形荷葉飯味道很讚但略嫌無乜荷香,罪不在佢,因為唔當造,不過一眾朋友對此仍十分欣賞,刮到乾乾淨淨。

南乳粗齋,南乳汁十個惹味又唔會太鹹,好正!

蛋白杏仁露,又係大激賞!香濃夾滑,又係美顏妙品,極飽之下仍然隊了碗半!

校友會格局有o的似同一座大廈o既寧波同鄉會甚至麻雀館呢一類私人會所,所以就千奇唔好 expect 係食裝修果隻啦,席間都真係有一個香港大學校友 (友人A小姐) o架,不過其實唔係校友入去食飯都無問題o既。

總括o黎講呢度o的舊式小菜做得唔錯,不過份量比較細碟,就算得兩條友咁上黎食飯都無問題。

埋單 $1045,除開每位 $150 左右,都算抵食,話晒都中環丫!

-------------------------------------------

香港大學校友會
地址:中環德己立街2號業豐大廈1/F
電話:2522 7968 (建議需預先訂座)
菜式:中式,廣東

lunch hour shopping

一般 OL o既 lunch hour shopping,不外乎係買o的零食呀,雜誌呀,或者係衫呀化妝品咁樣,但係我求先食 lunch......

搭的士入o左黃竹坑買 木凳!!!!!

多得蘋果,某傢俱店開倉勁減,今朝睇完報紙已經即刻仆倒去,我已經醒目仔地打定電話去 make sure 係仲有貨先起行,點知去到都係慢o左一步,行我前面個男人買o左一棟十張!

好彩我都無白行,執o左三張好o野!

兩張 Philippe Starck 99年出品「SLIK SLIK XO」 (http://www.philippe-starck.com/),一張白色一張橙色,我會用o黎 for 餐椅用,但係其實餐檯未買,可能要 Philippe Starck 襯摺檯,lol。



灣仔 T 字頭傢俬舖仲賣緊 $1000 鬆一張,話晒都 made in 法蘭西。



另一張就類似呢張,SEVEA 370,made in Italy,隻腳同相係唔同,下面個腳係原裝油壓轉轉腳,我會比書檯用,原價約 $1700。(無碌就 around $1500)

3張 木凳 加埋先$1000蚊唔使!!!!!:em_34:em_34

十分之 nice 同埋都幾靚女o既 sales 姐姐透露,佢地不嬲都唔係做開零售,係做豪宅樓盤傢俱,o岩o岩轉做零售所以開倉清咁o的舊貨喎~ 不過以家去我諗都無乜平o野淨,得返o的原價成皮o野減o左都要六千o既梳化呀咁o羅~

本來就唔送貨,但係咁橋另外有一單佢地有個客叫佢地 call o左車,我會加少少錢搭單送埋,仲平過我自己 call 雞記,要多謝呢位十分之好人士o既靚姐姐 sales 啦~

星期六就有靚 木凳 坐!呵呵呵呵呵呵~:em_34:em_34:em_34

for more details ─ Times Warehouse [link]

新居入伙篇 (五)

尋晚男友幫手砌好o左張書檯同埋個床頭櫃咯~ :em_35
真係辛苦晒呀,我屋企又無果o的螺絲鑽,人手上好鬼支力o架嘛~

我間房,日頭



正確o黎講係床尾櫃,因為床頭無位擺~

我間房,夜晚



新屋完成度達 70% 啦!好快就可以搞 house warming 了!

新居入伙篇 (四)

消失o左幾日都無打到 hompy,因為實在係太忙,勁執間屋同洗晒o的地方。依家仲爭個廚房同細房未執好,就大致上七七八八啦~

講多無謂,睇下相啦~



璧燈,燈罩又係 IKEA,蘇波榮,所以我會諗計搞搞佢。



我個廳,尋晚影o既,我砌晒全屋o的窗簾,好支力。又買o左o的大盒放雜物,擺晒響書架個底,唔,好整齊,嘻嘻~

爭 cusion 啦,茶几(or 角几),同埋揀o黎揀去都揀唔o岩o既地氈。

梳化底果團o野係我隻貓路過。

仲有一樣好緊要,就係尋日下晝已經完成整個舊屋交吉儀式,可喜可賀,又拆又搬,執到我同男友兩個支力到 PK,淨係行樓梯都行o左十幾轉,我真係一條毛都拆走晒呀!呀,o的按金我比佢扣起o左成千銀要o黎找水電喎,因為今個月兩張單都未到,其實果到最多加埋都係 $200,慘,都唔知幾時先收得返晒o的尾數。

至於房呢,聽日先影相啦,因為我o岩o岩訂o左個床頭櫃仲有書檯,禮拜二先送o黎,呵呵呵~ total look 嘛~



連林積積都有新床 目訓 呀,仲有新o既飯碗連水兜添~ 不過呢排佢就慘o的,我都唔得閒同佢玩,指甲都係早兩日先得閒幫佢剪呀~

本星期之食事雜記 (下)

星期六,本來係會去舊居拆o野,遇著滂沱大雨,最後都係打道回府,改做星期日,不過打道之前,都先去食o的o野o既。



美心MX 偶有好o野,男友呢個脆口豬扒煎蛋焗飯就相當唔錯,吉豬真係夠晒脆,茄飯味道亦都唔會過鹹,不過塊煎蛋個樣就削o左o的。



我個梅菜排骨蒸三色飯($28),三色分別係白飯,糙米同紅米,味道一般,係個飯蒸得太乾,同埋咪睇佢好似大大碗,其實個碗有兩層,個兜好淺o架咋。

另外搭多杯焗西米蓮蓉布甸(┼$6),十分麻麻,特別係 after 林先生玩o野撈到爛晒之後,不過點衰都一定好過大家樂。total 約 $70。

‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧

食完去o左萬寧買下雜物,有我最近好飛佛o既 Tempo 茉莉花味紙巾,我覺得佢似街邊阿婆賣o既白蘭花味多o的o既其實就,同埋竟然見到專 for M 痛o既 Panadol ,係咪新o野?香港就應該係 (新架坡早六七年前已經有),即刻買返盒看下門口。



‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧

星期六晚就先去o左尖沙嘴,中學同學 M 返o黎補擺酒,我唔得閒,所以就唔去飲,但係都擺低 $500 人情咁啦 (好赤:em_40)。另外佢仲山長水遠咁幫我o係 target.com 訂果堆 Luella o野拎o黎香港,仲要記得拎埋去酒樓,真係一千個唔該晒。



即刻就拆o左o黎用啦~ 嘻嘻嘻~

之後就直落老銅買買買,不過先去食飯先,已經成為我銅鑼灣飯堂之一o既 Pumpernickel,寫o左六千幾次了。

但係唔讚又真係唔得,水準穩定次次都好食,香港地好難得o架!



男友o既帶子鮮茄菠菜麵,帶子都幾大粒。



我o既煙鴨胸蕃茄乾扁麵,好惹味!

仲有超水準芝士包同埋熱啡,埋單只約 $250。

‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧

星期日去拆屋前食o野,唔食o野邊有力拆o野?

七喜分店都幾多,則魚涌呢間平日 lunch o黎食好多人o架,插針不入,星期日就舒服得多。



我o既鮮鵝腸拼牛腩伊麵,鵝腸爽兼彈牙但偏肥,腩勁唔得,又唔夠入味又韌!唔掂!



男友食及第粥,不過食剩好多,我問佢點解,佢話o的粉腸苦o架喎,咁點解粉腸會苦呢?原因只得一個,就係因為o的粉腸洗得唔夠乾淨o羅~ 但係o的豬潤就幾好味咁話喎~



另外要o左鮮鯇魚皮($16) share,好大碟,但係質素一般而已。

埋單約 $60,土瓜灣新山道分店好食得多!

----------------------------------

美心MX
地址:側魚涌英皇道971號英皇大廈1樓 (魚涌地鐵站A出口對面)
電話:2561 5760
菜式:港式,快餐

Pumpernickel
地址:銅鑼灣加寧街13號B舖
電話:TBC
菜式:西式

七喜粥麵小廚
地址:側魚涌英皇道925號地下
電話:TBC
菜式:港式

我著Eason



多謝大家力撐呢件陳醫神 tee!:em_45

反應熱烈,一早就賣晒啦!
(雖然我相信好賣係同我o既 design 無乜關係......)

買 o左呢件 tee o既各位 netvigator 用戶,快o的響你 hompy 張你著eason tee o既相 post 出o黎,然後 now.com.hk o既有關工作人員就會將佢o黎個大串連比 Eason 睇下有幾多人撐佢o架啦!題目記得寫做「我著eason」喎!唔係就 search 唔到你出o黎o架啦~:em_34

話時話,件 tee 比我想像中好著,o的料都幾舒服呢,嘿嘿~

more detail:http://media.now.com.hk/pcwg/event?eventId=eason_teee&categoryId=MUS

本星期之食事雜記 (上)

最近洗錢有如倒水,平日食飯就唯有慳慳地啦…呢期。



呢個無記錯的話應該係上星期四食o既,地點係則魚涌街市熟食層。呢個o野正確名稱係叫做茄蛋撈麵,好詭異。都幾難食,同埋我懷疑佢打o左四隻蛋落去,大碟到丫。

連餐有火腿多士同飲品,$23。

‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧

之後呢個係睇完《天生一對》,o係旺角新廣南食o既,時為 9.30pm,我同男友又唔係好餓,如果叫海南雞飯食剩好多又好似好大o徙,所以就咁叫o的一碟碟o野o黎 share。



o鞋口楊州炒飯,乾到會「界」損喉嚨。



炒貴刁,唔好食又唔難食,至少比炒飯好o的o的。



新廣南除o左海南雞飯之外,另一名物就係紅豆冰,紅豆大堆頭大大粒兼車煲得起晒沙,但又唔會爛溶溶,配盒椰汁花奶,實在係解暑良品...... 不過呢,我都唔知點解佢會隊隻碗裝紅豆冰過我o地!平時明明係用杯裝o架!

最吊詭o既地方係,我o地真係要o左支飲管就咁就飲

結論就係,去新廣南,除o左海南雞飯之外,千奇唔好食其他o野。

不過加埋就好平,只係 $70 蚊左右。

‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧

星期五晚裝完床又已經 9.30pm,去o左吉豬島搵o野食,行來行去,最終走o左上去 3/F 有間餐廳度試下。

餐廳裝修甚有廣東省一帶o的小酒店o既西餐廳風味,甚怪,因為呢度其實係主打和食o架喎!



男友o既日式燒西冷定食,七成熟,韌到咬唔開,非常難食!墊底意粉味道反而唔錯但係超油膩。另外再要o左杯無茶味o既凍奶茶。



我o既北海道風三文魚鍋定食,北海道風一定有夠牛油o係面撈埋,怕肥少女勿試。呢個鍋呢其實都幾好食,菜又夠多,稍嫌麵豉醬多得滯太鹹。

吉之島 card 有九五折,埋單 $170幾。

拉上補下,都可以再o黎食o既,不過就一定唔食牛扒o羅~

----------------------------------

新廣南餐廳
地址:旺角上海街631-633號地下
電話:2395 0695
菜式:東南亞

Restaurant Chalon
地址:側魚涌康怡中心第二期吉之島二樓
電話:2885 4531
菜式:日本

新居入伙篇 (三)

‧尋晚10pm去阿媽度接返隻貓返屋企,無見幾日肥屍大隻o左好多:em_36,可以改口叫佢做肥仔貓啦~ 走果時撞正落大雨,一抽二lang 呢咁 hea,結果都係搭o左的士,將軍澳坑口去屋企連來回隧道費,盛惠 $120!:em_40

貓大爺去到新屋唔係好慣,尋晚成晚捐入個貓廁所訓覺。今朝起身見到個廚房門比佢推開o左,好彩我有綁住佢o即!!!

‧講起搭車,我發現唔係好識點搵車返屋企。有無人知旺角,尖沙咀o係邊度有直接小巴 / 巴士去側魚涌呢?因為我其實都頗憎搭地鐵 (側魚涌個地鐵站超乞人憎)。我知銅鑼灣糖街有小巴去到屋企附近不過唔識邊道嗌有落。:em_36

‧以超值價 $80 買o左個新o既污衣籃 (差不多有半個人咁高),真係藤o黎o架!恨o左要好耐~ YEAH!

‧變得越o黎越師奶 ─ 因為我剛o岩申請o左張吉豬島 J-card 要o黎儲分~ :em_41 咁近,唔出返張好笨呀!

吉豬島 online shopping http://www.juscocityhk.com/b5/content.jsp
正!~ 試下佢同百佳邊間好o的再話比大家聽o下~

[轉貼]啤牌變出朱古力

又一個我無睇過o既日本型男魔術師 Cyril o既街頭魔術

啤牌變出朱古力~
http://media.putfile.com/chocolate69

嘩~ lum 死女呀!lum到爆呀!~:em_35

《天生一對》



尋晚休息一天,暫時唔執屋住,因為真係太支力。

早前抽獎得到兩張《天生一對》換票証,尋晚終於有時間睇。

例牌勵志,例牌歡喜冤家鬥氣變互相激勵,例牌o既劇情推進。

作為一套講o的咁 serious o既題材o既戲o黎講,都幾表面o羅。

之但係你話佢唔好睇,都唔係o既,有o的位都寫得幾好,譬如話燒炭果段啦,spa 度楊千嬅想佢兩個朋友和好果段,任賢齊開車撞楊千嬅果段都唔錯。

唔...但係兩個主角都面露疲態,楊千嬅同任賢齊都老o左好多。有幾個鏡頭,見楊千嬅o的肉甚至係鬆o架o羅,你都咪話,幾鬼驚。

戲個英文名改得幾好,叫做《2 become 1》。

Official Site:http://www.2become1themovie.com

題外話:我地去o左旺角 broadway 睇,因為咁橋男友之前有公事要響附近做,嘩,個迷你戲院細、o的位唔好坐無得捱住個頭都算啦!仲要係勁臭!一浸 up 味!真係臭到好似o的卡拉OK房一千年無洗過咁樣!

所以你都唔好怪我歧視九龍,係有理由o架o羅!

到期



終於輪到我夠期換智能身份証啦~~ :em_45

無得再扮細啦~~~~~~~~

我o岩o岩上 esd.gov.hk book o左 4月尾先換,
咁就仲有一個月時間比我瘦下面先丫嘛!

個妝點化同埋著咩衫好呢?頭又點整好呢?:em_36

真係煩死人!

順帶一提,呢期係輪到 19801981,同埋 1982 呀!

3月27日開始有得換啦~