公德

今天我們來談公德。



不知是否太古坊上班的人士(自以為)特別高人一等。

在這裡上班近一年,乘電梯,站在近門兩旁的人永遠也不會按關門掣。

無論是否明明電梯只剩我倆而我又站在老遠的角落,又或是我兩手都拿了東西。

特別是那些以為自己好靚其實又唔靚的 OL / 穿 suit 的高層樣男女人。

乘電梯時人人平等,我又不是「你條仔」,你又不是我老闆。

你挑了站近電梯門口的位置,請記得替人家按一下電梯。

--------------

女廁。

明明女人是坐著如廁,我不明白為甚麼可以尿濕廁板 (甚至地板)。

當然如果你生殖器長的有問題,不能怪你。

但是請你離去時用廁紙抹乾淨,囉。

還有,PMS 用後的東西請捲好才扔掉,我沒興趣知道你今天流量是多少。

我甚至相信不只一人這樣做,因為每個廁格都有這樣的情況發生。

當然這些不算誇張,我以前的公司,廁板上面有黑的連抹也抹不去的鞋印。







可人人外表看來都文明無比。



睡了一整天。

吃了半碗的叉燒米粉,覺得很飽,又嘔了兩次。平常我是可以吃掉一整個特餐 (即是有個麵,還有牛油方包和庵列那種) 還喊肚餓的那種女子。

看來這次病了可以令我順道減減肥。

買了《Death Note #11》,也看完了,就差一本便全卷完。早就應該完啦!(網上日文版早完了三萬年,中文版慢的要命。)#12 七月動漫節推出。

做夢見到朋友 E 先生,E 跟我同一生肖,但比我大 12 年。30多年來一直沒女友,朋友們也懷疑他是 gay 好久了,問他,又一副不置可否的樣子。

夢見我和男友去吃飯,碰到他拖著一大票的男模,鬼果隻,我跟男友說:「唏!一早都話佢湊鬼o架啦!」「食飯唔比呀?!」

就醒了。






可能是因為我知道了一個秘密,所以做了這個夢。

天國近了

芝士火腿三文治 / 蘋果汁 / 強勁冷氣 / 沙嗲汁司華力腸飯 / 熱咖啡 / 西柚雪梨汁

我同醫生講我食o左呢o的o野o既時候都覺得十分之唔好意思 (特別係沙嗲汁司華力腸飯)。醫生話我食得好雜,呢兩日只可以食粥同埋食碗粉。

下晝開始響 office 嘔o左兩次,一共嘔o左六次;醫生話係細菌入腸,令到個胃產生胃氣,頂住頂住;即係腸胃炎。我淨係覺得個人虛弱到不得了,好暈。

嘔到差不多連胃都翻埋出o黎。

------------------------

2.30pm

剛睡醒,好暈。

從昨天 5pm 開始計,嘔了差不多 20 次,吃了兩匙的粥,可以嘔到一碗水。喝半杯水,可以嘔到兩杯水。差不多每小時也得起床一次。

有上吐,當然有下瀉,不贅了。

唯一好處,我剛上過家裡的浴室磅,才一天便輕了四磅。

怪不得那麼多女人去做洗腸療程。

爸來電

我爸跟我媽離婚了好多年。

他很少打電話給我,一年也沒有幾次,跟我的弟弟比較親密。

昨天晚上我在煮雞翼的時係候,我爸打給我,說:

「喂細佬話你結婚之後搬返阿媽度住喎!千奇唔好呀!」

我一頭霧水「咩呀,結咩婚呀無啦啦,未有耐啦。」

「佢又話你阿媽叫你搬返去?唔好呀,第一,o拿,搬返娘家意頭唔好,第二,如果你阿嗎收你租又唔補地價,犯法o架!會比人拉o架!比人知道就唔得掂。」說時十分肉緊。

「無啦啦又點會有人知呀?」

「以防萬一呀女。」

吹脹。











.....大慨是因為看了《百法百中》吧!

實情是,我媽 suggest 我跟男友在這裡租約滿1年後就搬回將軍澳,她跟我弟弟和他的太太就搬去我媽另一個物業 (樓超級舊),那我就說,搬甚麼鬼,我這裡的東西才剛置已經花了好大筆錢,而且好端端的幹嘛要搬,就算搬,也是要結婚才搬。況且我雖然不是甚麼孝順女但也不至於那麼不孝,要阿媽住舊樓自己住新樓吧!

所以事情就不了了之。

怎麼我弟弟又當成真,跟我爸說啦?人傳人的說話有夠不可靠。

自己做.三個菜



昨天晚上跟男友的二人晚餐,洗連煮連醃約需1.5小時。

蜆煮勝瓜 + 蔥油雞翼 + 雞油蒜蓉炒西蘭花。

鹽水浸蜆(吐沙) / 鹽水浸菜(洗農藥) / 醃雞翼,請先全部同一時間進行,約需30分鐘。

------------------------

先說蜆煮勝瓜,因為呢這個菜主要是吃索滿鮮美蜆汁的勝瓜,故名之。



材料:蜆($10/半斤),勝瓜($6),薑絲,荵粒,蒜蓉(1-2粒)

調味:米酒(1-2湯匙,無的話可從略),鹽少許,麻油少許,胡椒粉少許

做法:

1) 焗爐先 pre-heat 180-200 度。

2) 蜆吐沙後逐個洗淨,用牙擦把殼的表面擦乾淨。

3) 勝瓜洗淨刨去那些硬邊皮,滾刀切件。

4) 勝瓜,蜆,放到玻璃盤子,跟調味攪和。面鋪薑絲,荵粒,蒜蓉。

5) 覆好錫紙,焗 10-20 分鐘即成。(玻璃盤子好處就是可以看到生熟的程度)

* 沒有放進焗爐的容器,可以用錫紙做個錫紙包,焗的時間可縮短一點。

* 煮的時候如果下多 1-1 1/2碗水,就成一味快速湯水了!(在 hompy 時代已寫過一次,不贅,有興趣請自己到那邊找一下)

* 推介一下這個玻璃盤子,是 Pyrex (since 1915) 的出品,厚玻璃可放進焗爐,做蛋糕也可以,吉之島早一陣子有特價八折,才$50。這品牌也有製造實驗室用的玻璃器具。

------------------------

蔥油雞翼



多謝網友兔叉小姐的推介,其實這個是參巧 梅璽閣的幸福生活 blog 裡面的做法,不過煮過以後有些東西要留意,所以再把做法寫一次出來。人家高手做的雞肉嫩嫩的樣子,這菜我第一次做,也有八成相像啦!

材料:雞翼 (8-10隻),荵粒一大把,薑片幾塊

做法:

1) 雞翼用先新鮮的最好,最近禽流感,只能用雪藏的了。解凍後洗淨廚房紙巾索乾水。

2) 這個我覺得是整個菜最難的部分 ─ 斬雞。雞翼一分為二。我只有一把小的萬用刀,力氣又不夠大,所以會有點碎骨,花了點時間把碎骨揀出來。

3) 花雕 和 鹽醃雞翼,30分鐘。

4) 下生粉,1湯匙,太乾的話可再下一點酒。

5) 開油鑊,爆香薑片和雞翼。大火炒。

6) 炒的有點乾的時候,下一碗水,蓋過雞翼就成。蓋鑊蓋,煮5-6分鐘,保持大火。

7) 蓋鑊蓋,一直大火炒至汁差不多收乾,下一大把荵粒。兜勻即可上碟。

帶蔥香,少許酒香,還有鹹香的雞翼,十分之好下飯呢~ 男友吃了兩碗飯,我也吃了碗半,這樣子實在是事倍功半呀......我是說減肥!

* 醃的時候可加一匙糖和薑蓉,雞翼便會帶薑的香氣。煮菜是變化萬千的事呢!

------------------------

雞油蒜蓉炒西蘭花



用炒完雞翼的剩餘雞油做,方便到不得了!

秘訣是油多一點也不打緊還有記得下點水咯~

材料:蒜蓉 (2粒左右),西蘭花 (洗淨切細,粗莖部分棄掉)

做法:

1) 用剩的雞油置鑊中,燒熱鑊,爆香蒜蓉。

2) 下西蘭花,大火炒,下少許水 (約 2-3 湯匙),大火繼續炒,。

3) 見顏色轉為深綠,下少許鹽,再炒幾下即可。


全部菜都清碟,男友最愛喫雞翼,我比較喜歡西蘭花,沾滿雞油的西蘭花很正點。

------------------------

甜品吃了 Wall's 出的雪糕蛋撻,在百佳買的,一盒六個。(約$20,忘了多少錢)



吃不出是哪個口味的雪糕,又不像是芒果,不過挺過癮就是了。「撻皮」是巧克力威化。

------------------------

至於今晚吃啥好呢,還在想,早上問男友,林先生話想喫豆腐啊~

做日式或中式好呢?:)

慶生

昨天晚上跟我的長腿好友 B 小姐 (假名,佢唔比我開名喎) 慶生,臨時拉夫下,走到我們的朋友 J 開的酒吧裡去。生日流流在 gay 吧過,很有點邪,本來想索性過老蘭落 Volar 吸收一下(直)男人的氣息嘛~ 可是我們一個穿了短褲+人字拖,另外 B 小姐因為眼睛有點不舒服又戴了眼鏡,這樣的格局莫說 Volar,大慨連旁邊的 Insomnia 也會拒絕我們內進。

然後又不知怎的,唱唱歌,又混到 12 點,時間有限又很晚,我只是買到 Starbucks 的 cut-cake 而已。巧克力慕絲蛋糕的味道居然也不錯嘛~

B小姐,我跟你其他的朋友一樣,祝你早日溝到仔!心想事成!

----------------



散局後,陪 B 去附近的某T字頭集團開設的 24 小時診所看眼睛去,12.30am 一個病人也沒有,環境很舒服寬倘,又有電腦免費上網,集團式診所確有其吸引病人的地方。

走廊貼了好多醫生的照片,有一個,幾 O!又竟然被 B 撞中,真人肥過相一點(我見到護士買了大袋麥當勞做宵夜,怪不得),也幾 O!絕對是「覆診-able」!

男讀者們不用愁,那裡做登記的護士(?)小姐有兩個是蹦蹦跳型的青春美少女!

飲到面紅紅,混身煙味深夜去看病,這個也算是有夠經典了吧!

吾友 X 先生 (假名) 的故事。

早陣子 X 先生跟拍拖幾年的女友分開,失戀了。單身後身邊女伴團團轉,工作關係,認識了 Y小姐 (假名,20到尾) 。X先生覺得 sporty 到不得了的 Y 小姐跟他很搭,興趣呀,外表身型都是他喜歡的一類型。

於是開始追求 Y小姐起來。

近月來每星期見面四五次,飯局呀,一起去滑水,去 gym 呀。好像順利到不行。

可是不久之前,Y小姐就當面拒絕了 X 先生,「先做個好朋友吧!我比較想 enjoy 單身生活。」她說。X先生也沒有放棄,每次 Y 來電,X也就會管接管送 (X先生剛買了架新車,因為失戀。<--- 補充,X先生話唔係因為失戀喎。)。Y去買東西,X也會付賬,當然還有每星期的晚餐,滑水也不用 Y 夾錢。X不算是有錢人也不是裝有錢,就是不大介意罷了。

好像還很有 chance 嘛。

後來 Y 透露越多又好像越不對路,Y 告訴 X 她以前的男友每個月都會給她幾千塊做零用,Y月入不算多,萬多塊,扣除家用也不算太壞。但感覺上就好像告訴 X 如果要做我的男友,你得每月付我幾千塊,還未計算平常的消費。

幾千塊不是大數目,X付得起有餘,可是這樣令 X 不大 feel comfort to give,付你幾千塊是為了甚麼?這是不是常有發生的事?

除了這樣,Y還有一個舊男友還在離離合合中,每天還跟 Y 有聯絡,當然 Y 會說是這舊男友纏住 自己。Y把這舊男友的 blog 發給 X 看。

「因為待你是好朋友」Y說。

裡面有提到很多 X 的事,當然都是 Y 告訴他的舊男友了。

X問我:「有沒有簡單一點的?」

我不曉得,跟現在的男友拍拖之後我對於外面光怪陸離的愛情世界和愛情觀很受不了,最討厭 play hard to get 的女 /男人。

當局者迷,外人怎樣說,也聽不進耳。

他們還在每天 MSN。

世盃篇‧德國對瑞典

阿媽屋企原來有 Cable TV,當然又走返上去睇波啦!屋企睇點都舒服過出街同人逼呀。

睇波就當然唔會無零食,上樓附近就有間新開最近頗出名o既表姐賣新派甜品。同表哥茶餐廳同一老闆,原址o係元朗。我當然又想試下睇下佢點解咁紅啦呢期。買走外賣。



(上)鮮芒果手卷,我揀o黎大家 share,此店名物之一。但係完全唔好食!係 pancake 皮捲住o的芒果布甸,好滯。

(下)麥提莎糯米糍,我揀o黎大家 share,此店名物之一。糯米糍包住一大粒麥提莎,係一o的都唔夾,分開食仲好啦。



(上)海底椰涼粉,細佬食呢個,畢o左兩啖,唔算好甜,但係呢個組合又可以有幾難食?

(下)南瓜西米露,阿媽食呢個,我無試,no comment。

細佬請。加加埋埋約 $100,食甜品都食成舊水。但係都係唔好食,唉!

--------------------

講返場波,都 OK 好睇呀呢場,不過都唔夠我屋企人睇波好睇,我細佬見到瑞典輸波黑晒口面,嘩哈哈哈~ 好笑!我阿媽好勁,陪我細佬睇o左咁多場之後學識o左睇波,認得邊個係奇連士文呀,領隊喎唔係球員喎!仲講波o添喎!

--------------------

表姐手勢新派甜品
地址:將軍澳厚德商場 2/F
電話:TBC
菜式:港式

上樓

星期六返阿媽度食飯,今次就出街食,但係阿媽又煲o左湯,所以訂好檯就走返屋企飲o左湯先,魚翅花膠蠔豉豬骨湯,好補。



飲o左一大碗湯又食o左好多湯渣,其實已經飽得好緊要。

--------------------



阿媽屋企附近,相當無啖好食。附近有個屋村商場仔o岩o岩 revamp 完,本來o既稻香一拆三,分做 上樓 / 潮樓 / 同埋稻香本身三間 (同一集團),訂位情況混亂,6.30pm 去到已經7成滿。



裝修走新派路線,靚唔靚則見人見志。不過呢盞燈 OK 喎,用o的膠珠串埋扮水晶,可參巧。

屋企人對食飯無乜意見,加上我地5個人全部飲完湯先走落o黎,所以我只係點o左好少o野。



涼菜,雲白肉。味道 OK,不過不失。o的粉皮落得多得滯喎。最好食算呢樣。



涼菜,四喜酵麩。首先唔係手撕已經唔掂,味道偏酸!但我細佬好 buy 呢味,居然。



小籠包 (半打),唔難食又唔好食,塊皮好厚。



賽螃蟹,睇樣就知唔好食。借問聲果個蛋黃去o左邊???瑤柱發得唔好,有o的硬。



竹笙素燴,個勝瓜連色都變埋!想點呀?!

服務唔 O,有禮貌但蠢,拎住地拖幫我地落單,坐低好耐都唔比 menu,而且勁 hardsell 我o地食果o的唔抵食套餐。咁o岩我o地坐果張檯個地下有事,不停滲出地下水(!),應該係o的裝修做得唔好,地板下面有水管滲水。個侍仔不停拖地都無用,拖極掃都係勁濕。扣晒分。

男友請。埋單 $2XX,唔算貴,但係唔好食,幾平都無用。

--------------------

上樓
地址:將軍澳厚德商場2樓
電話:TBC
菜式:上海

身外物雜談

星期六陪男友去剪髮 (男友已經被我潛移默化跟我 share 同一個 stylist),新髮型剪的短短的,以前幾年他都是留半長髮,像仔仔的那一種。後來轉到現在的工作,整天得穿上恤衫西褲上班,長髮配恤衫,怪怪的,所以都剪短了不少。這一次是幾年來的最短。

我覺得有點像 Jacky仔,不是張學友,是「去迪士尼做足準備」的那個童星 Jacky仔 啦~(笑)



當然是一個長大了的帥哥版本。

--------------------

逛 Times Square,90%的店都在打折。

我 最近在找一件純白色無 print 的 Racer vest,好配前一陣子買下的軍綠色 pocket pants。找了 ZARA,有一件很合身的不過穿了那些相信15分鐘後便會弄跌的珠仔;MANGO 人很多,就是沒有想要的東西,也試了幾款 wasitcoat,最近很流行的西裝背心,cutting 怪怪。



終於逛了moussy ,大部分的衫和 sales 們的硬 sell 功都很旺角商場仔feel,不明何以會被吹捧(因為野口強?)。而且衫的 size 也好小,tee 都小的像童裝。不過索價不算很過份。

我已經好多年沒有買日本的品牌(無論衫/鞋),好像專跟我作對!

--------------------


(photosource from ebay)

最後甚麼衣服也沒有買,在 9/F PageOne 買了七月號的英國版《ELLE》(Keira Knightley封面),因為我貪小便宜,這期送 Kurt Geiger 的人字拖 (四色任擇,腳小的選 S/M,腳跟我一樣穿40號鞋的話記得選 M/L),我記得上年差不多時候也是送 KG 的人拖,老實說上年的比較漂亮 + 我家裡各式各樣常穿的人拖有超過五對,不過還是買了。我挑了金色。

--------------------

去配了半年份的隱形眼鏡(我戴的是每日即棄型),男友順道也一起訂了。

女孩子之間有說玩得特別 close 的,因為作息生活差不多,連經期也有可能會受影響變的來潮日子相近。

我和男友的近視度數,竟然四隻眼都變的一模一樣都是 520 度!!!!*o*

當然男人是沒有月經的啦~(爛gag)

--------------------



06 summer best buy。

我想這個是半單 out 料,早有聽聞 Tom Ford 跟 Estee Lauder 會合作出化妝品(LINK),06 年的 summer collection 相看到還是第一次。系列名為azurēe,湖水藍襯白的 retro 設計好漂亮 (有點像 Tiffany??)。



最重要的是有沒有人可以告訴我香港有沒有?

幼齒‧中女

剛剛星期二出版o既《一本便利》,封面係濕晒身o既 14 歲細路女組合 Cream 入面最靚果個 Ranee 李蘊。






如果你有個女14歲,你會唔會倍佢去影輯濕身相成為無數戀幼齒麻甩佬性幻想對像?(內文有提及 Ranee 拍照時父母皆倍伴在側)

無言。

我保守囉,或者。

-----------------

我想問下中女o既年齡線其實係咩?

我o岩o岩 25 歲生日,已經驚緊有人會叫我做 中女 / 姨姨 / auntie / 阿姐......

係咪一到 / 接近 30 就叫中女,咁男人呢?點解唔叫中佬?定中坑,中坑o既年齡線又係咩?

-----------------

電視劇《男人之苦》劉松仁硬滑稽式中坑好肉酸,的衫全部好似領口會「wear」開咁「hea」,加埋 吳唱K 扮入世未深o靚仔,好老土。《女人唔易做》雖然劇情更保守,起碼仲有吳美珩一身 Chole (不知是私伙真貨還是 sponsor 仿製之流) 有型有款。

要代我個佬平反呀,劉松仁個角色影衰晒工程師啦!工程師唔一定咁「dude」呀!

生日飯(七) 狸屋台屋

舊同事 MC小姐 同就快嫁人o既 ML小姐 見我生日,特登約埋食 lunch,其實大家都響附近工作,生日正好有個藉口約埋一齊食下飯聚下舊咁。



我今次想食日本料理,篩選了好多家店之後,ML 提議去屋台屋,但係太古坊附近其實係有兩間屋台屋,一間o係基利路,裝修比較 up dup,但係佢o地有我響香港食過最好o既冷烏冬;另一間係呢間響太古城o既分店,店不好找,係太古城往海皮方向最出果座地下。

環境本來都唔錯,牆上面有o的畫得好靚o既狸貓 illustration,亦有幾個位坐塌塌米,但係位擺得好逼,逼到係人貼人,係收得平o者,但都唔洗逼成咁呀?

訂好o左位,都要等成 20mins,客路方面九成係附近工作o既 OL,要先響門口點o左菜先。

set lunch start from $55-$95,唔清楚有無加一。

我點o左一個 $65 o既 set,先來一小碟前菜,係中華沙律(!),然後 waitress 已經急不及待問我地飲咩,我問佢有咩揀,略帶鄉音又無甚禮貌o既 waitress 表示只有蜜桃茶或者咖啡,有夠古怪,我點o左冷蜜桃茶。



鰻魚飯,小 size,米竟然不是日本米!!!!這算是哪門子的日本料理?鰻魚很多骨。



冷蕎麥麵,麵有點怪味,蝦肉是霉的。

最後甜品,係一粒雪米「慈」(!),點解搞到好地地一間本來幾好食o既餐廳淪為港式日本料理?唉,早年呢度曾經有大量日人幫襯o架~~

雖然食物不濟,但係餐飯我食得相當開心,三個女人聚埋講下近況不知幾好。

埋單兩百多,多謝 MC,多謝 ML。ML,我儲緊錢去飲o架啦~

----------------------

除了吃了一頓不好吃的日本料理之外,我昨日運氣也相當的背。

‧一心想去 gym 上 bodycombat 的課,已經比上課時間早了 10 分鐘到達,都 full 得要截人。留意,我去的是 Fitness First,不是 Physical,搞甚麼????

‧做 gym 忘了帶電話,男友回家找我找不到,害我得自己吃晚飯。

‧晚餐買了一個雲吞米跟腐乳通菜,難吃得比死更難受。

----------------------

狸屋台屋 Yataiya
地址:側魚涌太古城天星閣地下1004B號舖
電話:2967 9219
菜式:日本

媽姐



我和媽姐緣慳一面。

尋日去安蘭街 Nail Nail 修甲 (題外話,做o左隻 broken gel nail,貴,一隻都 $120,加埋修手,就 $270 鳥~),襯未夠鐘,去望下個 Martin Margiela exhibition,點知o岩o岩就完o左啦~ 激氣。

呀果個位除o左有媽姐之外,仲會開間 Ann Dem. 專門店,我幾百年無行過中環,原諒我講o的 out 料啦。

結果去o左行o左轉 D-Mop,o的衫悶到暈,D-Mop o的 buyer 真係好唔掂。做緊 30% off,再平o的就o岩啦,mark-up 咁勁。

好悶,完全無買衫o既意慾,慘了。

生日飯(六) 續篇 之 生日禮物

其實尋晚我已經收到,係一隻戒指。

o拿~ 唔好嘩嘩聲住,送禮人話無意思的,for birthday only,只係知我想要好耐先買。

實際個情形係,我係想佢送戒指比我好耐,咁我係典型港女嘛,好敷淺的,想要一 pair 情侶戒指,好似可以對外宣佈有人認o左頭咁丫嘛~ (當然,meaning 更多,越好)

中學開始,我就鐘意 Tiffany,因為佢係一個代表忠貞愛情o既品牌 (比o的廣告洗o左腦)。以前收過大大細細o既 tiffany 禮物,但係無一隻係戒指;又收過一o的戒指,但又無一隻係 Tiffany。

呢隻係我第一隻 Tiffany 戒指,係 Titanium (鈦金屬) 做,(好似係)上年秋天出o既新款。我見到街果o的男男女女都戴銀款 1837 戴到我有o的怕,呢個新o野,襯唔係咁多人戴,快o的戴o左先。



本來之前 x'mas,想買一隻比男友,佢話唔要,擱置o左,但有一齊睇過下。我覺得黑色果隻好靚。



結果我真係收到一隻黑色款做禮物,我收到果下,係有o的呆,因為恨要好耐o既o野竟然真係比我恨到!(我一定要寫出o黎呀,有人以為我唔鐘意) 唔識做咩反應好。無人會明,點解我會咁o既反應。

男友好叻,識得偷o左我兩隻戒指去度 size。


不過戴上手,先覺得個色唔係好襯我。下晝拎o左去 Landmark 分店換做銀灰色。

即晚就戴住去食飯。多謝你,my dear!

我希望下一隻收到o既會係 Tiffany o既鑽戒 (細粒都得o架啦~我唔大貪),最好係有 purpose 下用o既o添,嘿嘿嘿嘿嘿嘿嘿~

生日飯(六) Le Mieux Bistro



我全年最緊張o既其中一餐飯,就係我自己o既生日飯啦!

呢間我揀,因為想試好耐,同埋唔算貴丫!幫男友慳返o的錢嘛~(佢本來諗住揀 Amigo o架!)

先講少少 background,呢度大廚 Ricky 本來係萬麗海景 Scala (食海鮮十分出名) 做o既,後來自己出o左o黎開呢度,好評如潮,Ricky 手勢我想試好耐,但係 Scala 咁豪我食唔起啦,啦下只係幾百蚊就食到,仲唔仆到去呀?!

晚餐全世界都係食 chef set dinner,$500 /6 個 course,menu 要當日朝早先會知有咩食。



環 境 comfy,部分座位有海景(譬如,我今晚坐果張),廳有大約6張檯,每張最少坐4-6人。另有 party 房一間,今晚就有堆 executive look 西裝友 book o左啦。客路 average 35歲+,仲好,起碼靜o的。 主要做熟客生意 (Ricky 先生滿場飛同o的客人吹水)。

食左的咩呢,睇相!!!



麵包 (咁都好影,無聊到爆),好食,上檯時係微暖,唔係微波爐叮叮貨,但千奇唔好食晒,留肚。



Appetizer,係呢個 Gazpacho Jelly(西班牙海鮮凍湯o者喱),上面係日本甜蝦,超甜,下面係新鮮蟹膏混蟹肉,中間在撈o左o的青瓜絲同唔知咩汁,酸酸地,好開胃。



Starter,Tian of Lobster, Scallop + Salmon,回味無窮!o的帶子鮮甜到呢~~~~~~~~~~~ 又好 juicy,伴埋旁邊o的柚子橙汁,仲有啖啖龍蝦肉,實在係好味得好緊要,男友盛讚呢個!



湯係 Beef Consomme,牛肉粒用上澳洲和牛,入口即化,個湯你以為好淡?我話你聽,o的牛肉味濃到不得了,配埋o的洋荵,餚唔知幾耐先餚到呢啖湯出黎呢?白色一粒粒果o的係法式燉蛋喎~

(相片已被移除)

生日 special,(準備)飲湯圖!
(我梳o左九一界,o的頭髮影出o黎一餅o野咁~:p)



我全晚最喜愛第一位,Roasted King Prawn,燒大蝦!蝦開邊放o的類似千島汁(??)響面,傍邊係澳洲有機 BB 菠菜,果粒細細粒o既係西西里蕃茄,全部都係好尾到不能,可一不可再o既絕配!

(相片已被移除)

送多張美女切蝦圖,生日先 post o架~ 嘩哈哈哈哈~



main course 係 U.S. 安格斯 rib eye,同 Ruth's Chris 大啖肉o既果o的又有唔同,感覺上比較細緻同 delicate 一o的,我覺得呢個更適合女仔食,而且佢燒得實在係好靚,係 just right!



是日甜品係 home-made 黃花果(?)雪糕、巧克力慕絲、chocolate ice-cream puff 仲有一小堆生果。朱古力果兩樣都係掂,雪糕滑奶味重但肉桂味都重 :(,仲有生果堆入面有木瓜粒 :(,全晚係得呢兩樣小物我唔食o架jet。

set 包 coffee / tea,我o地都係飲啡,呢度o的啡都係好靚,濃而且滑,即叫即做,我成日覺得,要試一間餐廳有無誠意好唔好食,最好由杯啡度入手,所謂見微知著。呢度,當然係掂。

overall 呢度的確係海鮮比較出色,全部都新鮮到好似o岩o岩釣上o黎咁,但係其實味味都十分掂,係無任何一味唔好食/ 唔對胃口(除o左o的木瓜粒啦下),真係過份!(我食過咁多貴餐廳,好少可以做到呢樣o野) 服務亦都好好丫,每上一個菜都會詳細介紹下先。

另外呢度無 free water 供應,只有 Panna,飲o左兩支 ($30@)。

埋單連加一 $1,166,實在係物超所值。推介!!!

多謝超靚仔林先生。*3* kisssssss~

----------------------------

Le Mieux Bistro
地址:柴灣嘉業街18號明報工業中心B座407-408號
(無車的話,最就腳建議柴灣/杏花村地鐵站打的)
電話:2558 2877 (必需電話預訂)
菜式:法國 / 私房菜
備註:無酒牌,但唔收開瓶費
http://www.givemefive.hk

自己做.蒸煎釀豆卜



尋晚晚餐,自己煮,2人份。

點解會係蒸煎釀豆卜,而唔係紅燒唔係炒,理由好簡單,因為怕熱氣 (我生左粒飛滋)。

全部加埋約有20個,我諗我食o左6個,其他全數男友一手包辦,仲添飯喎!真係比面!!

呢個工序比較麻煩,所以搞到我無時間整多味。

蒸煎釀豆卜

材料:豆卜($5)、瘦肉($5)、蝦米、同埋雪櫃有用剩o左o既墨魚丸2粒 (早兩日我滾o左紫菜墨丸蛋花湯,無影相所以無寫)、伴碟用小棠菜1棵、伴碟用芫茜

做法:

1) 瘦肉剁成蓉,用老抽、生抽、糖、紹興酒少許、胡椒粉少許、生粉、水 醃30mins,備用。

2) 蝦米熱水浸軟,切細粒。墨魚丸洗淨,切細粒。

3) 豆卜略洗,開邊,將入面o的豆腐渣搣晒出o黎 (唔好掉),就有一堆豆卜兜仔啦。

4) 將 (2) 同埋 豆腐渣 撈落 (1) 度,搞勻。

5) 開少少生粉水,將 (4) 釀入 (3) 度果時,先搽一搽(用手指得啦)個豆卜入面,少少好啦。

6) 開平底鑊少少油略略煎好已經釀好o左o既豆卜,肉向鑊面,一放落去5秒左右就可以夾返起,作用係蒸果時舊肉就唔會散開,同埋個面靚o的囉~

7) 夾起之後排好響碟,水滾後,大火隔水蒸8-10分鐘就OK咯~~~

8) 開個蠔油獻 (蠔油+生粉+水),煮熱後淋響面,再擺埋o的小棠菜呀,芫茜咁就可以上得檯啦!




另外有蒜蓉生菜,我竟然忘記o左落鹽,落o左少少豉油囉所以咪 :p

甜品食咩呢??










嘿嘿嘿嘿嘿嘿嘿~ 有人懶鬼馬買o左蛋糕仔搭正 12點 同我吹蠟燭啦~ :E

多謝男友~ *3*

我今年係食過一個生日蛋糕,吹o左一次蠟燭咋,就係呢個囉~ 上面係布甸,個杯入面係 fruit cake,$15 from YAMAZAKI,我覺得好食過男友生日我買比佢果個 Teresa Festival 白酒桃蛋糕喎 (果個兩舊幾水呀!)~~~

至於生日禮物呢,都收o左啦,不過有少少問題,下晝要拎去換,係咩o黎o架呢?下個 post 先o係度講啦~ kakakakakakakakaka 正日慶祝飯今晚去食~ 啦啦啦啦~ :E

生日飯(五) 住家飯局

兩餐,第一餐就唔係生日飯,上o左男朋友屋企食飯,算係慶祝父親節咁o掛 (但係無人有買禮物,我都無:p,因為男友幾兄弟都無買,得我一個買,好似做壞規矩咁~)~ 其實男友 mummy 已經叫我地返去食返o左好多次,最終星期日就返o左去啦~

無影到相,食o左半隻燒鵝蒜蓉炒蟹,繼續有炆海參 (因為我鐘意食呢所以男友daddy又整,嘻嘻嘻~),蝦醬通菜蠔油生菜潮式煎倉魚仔 (勁正,我好欣賞呢味,脆卜卜),自家製鹵水鴨腳 (連鹵水都自己做,男友 mummy 好強!),另外繼續有海參青邊鮑花膠湯,正!

6個人7送1湯~ 超飽!

返屋企果時去o左 7仔買甜品食,竟然出o左孖條復刻版!雖然係 Wall's 出 (Wall's 出o既o野 90% 都唔好食),不過貪得意都好過癮呀~



其實我係從來都無食過孖條o架以前,聽就聽得多,食都係第一次!

$3.5 一人一半,我就已經好開心咯~~~

-----------------------

其實我阿媽都叫o左我同男友返屋企食飯叫o左好多日,咁最後阿媽就排到尋晚(星期一)先有期,細佬老婆o黎o左香港,但係細佬臨時有 job 接返唔切o黎食,男友由係比老細捉住上唔到o黎,最後就得返 3 個女人食飯囉~



炒田雞,係我特登 order 叫我阿媽整,我好鐘意食田雞,但係我唔識點「湯」,男友就唔食田雞既,所以出街又唔叫得,自己搬o左出o黎呀,有幾年無食過啦~~~ 真好呢~ n_n



炒花蟹,我另一「飛佛」,基本上係海鮮我都十分歡喜,阿媽尋晚整得呢個好好味,唔會太鹹,雖然無乜肉食,我都食o左整整兩隻蟹。



腐乳通菜,都幾好。另外阿媽煲o左一整日o既花膠瑤柱豬骨老火湯,拎o左一壺比男友。

兩日都係咁補,有乜辦法唔肥?!*_*

-----------------------

阿媽送比我o既生日禮物係一隻用o左十幾年o既生鐵鑊 (黑色好重果o的呢~),因為之前我問阿媽佢隻鑊邊度買,佢就送o左佢果隻比我啦。唔好笑呀,因為呢o的鑊有錢都買唔到,用到令立立,我記得我睇 黃 又又 如 寫o野,都有提過佢有隻鑊係阿媽送比佢,跟住佢嫁人,離o左婚就帶埋隻鑊走,鑊不離身o架!

新買o既生鐵鑊要開鑊工序麻煩,要先用豆豉蒜頭咁唔知點樣爆o左先可以用得,因為阿媽怕我煩 (同埋好明顯,我唔識點整),佢就用新買果隻,我就用呢隻舊o架囉~ 新買生鐵鑊只係 $幾十蚊,上海街一帶 / 賣舊式廚具o既地方 都有售。

所以呢,我成日覺得以家出邊買果o的易潔中式鑊賣咁貴幾百一千咁好痴線,係o的唔識煮飯o既人先會買。我無呢隻鑊之前,只係用隻 cheap cheap 平底易潔鑊 ($20, from IKEA) 煮飯,都煮得好食,我相信加埋呢個新鑊呢,嘿嘿嘿~ 一定更正!!!