自己做。猴頭菇蘋果甘筍瘦肉湯

不知何故這幾日突然好想飲蘋果湯，但求阿媽不如求己，自己煲更簡單。

我煲老火湯愛以蔬果入饌，味甜性溫，而且只要材料夠足，就算一點鹽不落亦夠味道。中醫認為蘋果能生津潤肺，補心益氣，健脾和胃，是全天候都宜食的水果。煲湯的蘋果以果肉較硬的華盛頓蘋果較佳，不過香港人愛吃果肉較脆身的富士蘋，華盛頓越來越少見；我走了兩個果檔都只有富士蘋，懶得再行，故今次以富士蘋來煲湯。

猴頭菇蘋果瘦肉湯

材料：

1) 蘋果 2 個，去皮去芯切件，備用。

2) 甘筍 1 支，去皮切件，備用。

3) 猴頭菇 1-2 個，略略沖水，備用。
4) 瘦肉 適量 (約 HK$10)，切塊狀，備用。
5) 沙參 適量
6) 玉竹 適量
7) 蜜棗 2-3 顆
8) 南北杏 適量

做法：

1) 燒滾一鍋水，瘦肉略略汆水 1 分鐘，盛起備用。
2) 水倒掉，再鍋中放入所有材料，落水蓋過所有材料。

3) 大火煮滾後煲 10-15 分鐘，轉小火煲 2 小時。
4) 關火，試味，如覺不夠味可加一咪咪的鹽。(我煲的這個完全沒有落鹽都好夠甜)

沙參是必膽拖玉竹乃是國際慣例 (笑)，沙參玉竹清熱養陰，生津潤燥，功效相輔相成。南北杏則可潤肺，止咳化痰，但不宜落太多，除了帶苦味之外；北杏本身帶小毒，煲湯的話約4.5至9克已可 (一両為37.5克)。