生日飯(二) 家庭 feel 泰菜 ─ 琼姐



嚴格o黎講,呢餐唔算係生日飯,因為我都有份比錢。

但係就係我送比自己o既其中一份生日禮物。

三個月前同好友 J 先生因為一o的低能事,吵嘴收場。我o地兩個都超硬頸,就係咁大家無搵大家。但係兩個禮拜前我忽然間覺得自己作為一個大人 (!),咁樣無o左個 friend 的話,好似真係太低能,低能過我o地鬧交果件事,就係咁,我主動搵返 J,又好返無事咯。

尋晚男友臨時有事做,唔得閒理我,我就襯呢個機會約埋 J 食飯,地點係 J o既推介,帶埋新男友 T (OKOK,唔係男友囉,lover 啦好未?) 一齊食飯。



琼姐呢間食店係 J 老闆o既酒吧一個泰藉工人介紹,係呢位泰藉工人個女開o既,J食過好食,就不停推介比佢身邊o既朋友。地點係銅鑼灣登龍街一個上樓o既地方。唔算難搵。

環境就真係好地道泰式家庭feel,略帶 up dup,不過都裝o左部 Plasma,播下衛視電影台咁 (多謝支持蔽公司),一入o黎覺得有o的怪味,類似o的屋企味,咁人人屋企都有o的味o架啦,坐落o左,又唔係好覺。無論煮同招呼人客都係全女班,加埋有3個人。

是晚連埋我o地得兩檯客,星期一嘛,係咁o架啦。



主要係 J 發板,點o左泰式刺身蝦,我不嗜辣,食o左3隻,頂唔順。但係蝦十分之新鮮。



沙嗲,其實我地係揀牛肉同雞肉唔要豬肉,不過可能泰藉女侍中文唔係太好,聽錯,上到檯就得返雞肉串燒,雖然都好食,但係好似若有所失咁。沙嗲汁係自家調製,魚露,乾荵,加o的椰奶,撈埋酸酸甜甜,很正。



冬蔭公,T 和我都不嗜辣,所以要o左一個少辣版本。極多大蝦,用料十足,很惹味,我其實頗為討厭冬蔭公,也連盡三大碗。



泰式炒芥蘭,原本係要鹹魚炒,女侍又聽錯,變o左泰式。芥蘭飛水做得足,又夠嫩,簡直就有如菜心苗咁鮮甜。鑊氣十足。



海南雞飯 (必需預訂,menu無),主角出場,千呼萬喚始出來。窩飯足 4-5 人分。我o地得三個人都食晒。米係泰國絲苗,較長身偏硬,每粒都沾了雞湯,顏色黃黃的,很有o趙頭。



很多有做海南雞飯的飯店較注重飯而忽略o左雞,往往都係得到有如白洽雞胸般的「o鞋口o鞋面」雞肉。這個,我覺得係近年我吃過最精采的海南雞,黃油雞肉極度嫩滑,雞味濃沃,最精采要算是雞皮,該是蒸好雞之後再做了過冰水河的麻煩工序,這樣雞皮就有如做了 facial 一樣,一冷一熱下毛孔就會收縮,滑得不得了。浸過冰水後還得再次蒸熱才上桌,怪不得等了差不多一小時,但也是值得的!

另加兩罐可樂,泰國水貨,完全泰國風味。

買單 total $285。

除o左上菜比較慢 (係超級慢,但係原諒-able),食品質素同價錢都值得推介。

-------------------------------

琼姐
地址:銅鑼灣登龍街 20-22 號 1/F (上樓梯後分岔口轉左)
電話:TBC
菜式:泰國
Designed by OddThemes | Distributed by Gooyaabi Templates