筲箕灣搵食記

是日運氣麻麻,去完上環收數,諗住去順興行買皮蛋整子薑糖沁皮蛋招呼客人,因為星期五有班大爺會去我屋企,先 6.30pm,已經一早收o左舖。再行上去陳薏齋買蝦子扎蹄,頂,又閂o左門。

行到去中環幫襯黃 又又 如買魚露(因為用晒),醒唔起佢 7pm 就收皮,去到,睇住佢鎖門,lur 個阿姐比我入去買少少o野,入到去,先話o的魚露 all out of stock,仲要唔知幾時先返貨。

TMD。

------------------------------

側魚涌食到無o野好食,開始進攻筲箕灣。

男友要成 8 點先到,我都講過,我今日好運滯,食開安利舊鋪,晨早已經閂o左門。

唯有兵行險著試下新舖,據聞都係老闆o的親戚撻o左條秘方+炒大穫走出o黎搏大霧開o既,裝修叫做好少少舒服o的。

當然裝修幾靚唔好食都係無用。



我食片頭切腩撈粗。

以前呢有一輪去完石澳曬太陽,曬完好鐘意自己走o黎(隔離間舊舖)食返碗,再搭支冰凍細可樂,人生之一大樂事也。(另一愛係附近南洋館,已摺。)

呢碗o野,招牌切腩對辦,夠軟稔又唔肥,炸魚皮都對辦,但係招牌魚片頭唔得,炸得一o的都唔香,最大鑊係個粗麵,我唔知係個汁有問題,定還是粗麵有問題,o的鹼水味好勁,勁到我每咬一啖o的麵,都漿住個口,食到o的牙酸酸軟軟,好奇怪。

仲有果碗湯,不提也罷。



男友食雲吞切腩撈粗,我食o左粒雲吞,竟然幾 O,再問男友覺唔覺得碗麵有問題,佢又話無,仲話好好味o添呀咁,但係我重申,舊舖真係好食得多。可能我真係好黑仔。

連埋一個油菜,埋單 $60。

------------------------------

個麵好怪,所以我要搵o的好o野蓋過佢,行o左去食呂仔記渣咋。

呂仔記出名,出名到成間舖都貼滿晒o的剪報,好狀觀。

一人一碗渣咋,我要凍男友食熱。



我一食,就覺得麻麻地,係好多料,又有椰子肉又有剩,但係普普通通咋喎,心諗點解咁都有咁多人幫襯,於是我畢o左男友果碗熱渣咋一啖......oh shit!好食咁多o既?!好香又滑呀。

我果碗完全唔係路呀!大家有機會o黎幫襯記得唔好好似我咁白痴食凍渣咋。

所以,我再叫o左另一碟魚肉燒賣。



可能你已經心諗緊,「o下?粉雷雷燒賣有咩好講」,但係呢個唔同,一o的都唔粉雷雷,真係全魚肉打成既自家製燒賣,跟據牆上面o的剪報寫住一o的肥豬肉都無溝o添o架,好鬼彈牙,而且只係$10/8粒,好抵食。

btw,老闆個女細細個面仔肥o都o都超爆得意。

埋單 $32。

------------------------------

安利大排檔(新舖)
地址:筲箕灣東大街57號
電話:2567 7122
菜式:港式

呂仔記
地址:筲箕灣東大街121號A地舖
電話:2885 8590
菜式:港式
匿名 說...

I want 安利大排檔(old 舖) address, pls ^^!

Thanks!

匿名 說...

1. 心 - semi-soft
2. 安X。大哥有遺訓,大嫂唔認數,細佬開新舖。
3. 好豬嘅南洋館同壹壹南(已摺)有D關係。

匿名 說...

北角麗池的炳記。
太安樓泰國嘢,忘記名?!

素顏天使 說...

anonymous > 安利大排檔(舊舖) 地址有兩個, 就係新舖隔離個 up dup 舖位, 斜對面果個都係屬於舊舖o既.

素顏天使 說...

難渡怖山 > 嘿嘿嘿, 真係邪, 我訂o左今晚炳記同班損友食飯。平日好難去,得我同男友兩個。不過話實,我覺得佢好麻麻,八寶鴨蓮香好過佢,杏汁白肺湯HKU校友會又好過佢。所以我訂o左糯米雞,叫做有o的特色囉。

太安樓泰國嘢,more detail?

匿名 說...

鰂魚涌以東至筲箕灣曾經係我環頭,好懷念呀。

匿名 說...

同埋我鍾意粉雷雷呢個形容詞, 唔知可唔可以用嚟鬧人呢。

素顏天使 說...

講開又講 > 咁有無好o野(食店)介紹先?

匿名 說...

如果你有日唔想煮飯, 可以去筲箕灣道"蓉記小廚"(近工聯會),睇吓佢住家啲定你住家啲。個feel有啲似天后金元小館。

仲有東大街"金東大",主理混省fusion菜。不過聽講依家跌左watt, 你有興趣查探吓。
佢有好cheap嘅蝦仔湯飯,不可不吃。

仲有鯉景灣"東堤", 呢間你應該知,吞pop勝地。果咋所謂蘇豪東舖頭, 我只會番兜幫襯呢間。

完。

素顏天使 說...

講開又講 > 嘩正~ :D 唔該晒!!!! 有排試啦!!!~

Designed by OddThemes | Distributed by Gooyaabi Templates