金雀餐廳

金雀個老闆如果都有份上各大樂壇頒獎典禮o既大舞台的話，我諗佢一定要多謝王家衛或者張叔平。

要不是《2046》(定係《花樣年華》呢？anyway) 曾經響度取景，令佢無端白事變成旅遊名勝，我本人相信，佢一定執o左九世，好幾年前未有呢部戲o既時候o黎過，邊有咁多人o架o者？

求先 8pm o黎到，要等位不特止，仲要 book 添呀！！

o下？？book 檯？我以為自己去o左 amber。

當然我咁講可能刻薄o左，其實金雀就唔係唔好食，只係，呢o的老牌豉油西餐廳o黎講，佢唔算係好得果批o羅~

咁點解o黎o左？因為太平館無位 and then 條街又太凍 (得 9 度咋！)，that‘s it。

同男友要o左兩個特餐，因為之前隊o左個士多啤梨窩夫尚未落格，特餐響眾餐之中係份量最細。

最典型的牛油餐包同埋羅宋湯，唔難食又唔特別好食。個湯有好多菜。

男友食黑椒牛柳，ok啦~

我食燒汁西冷扒，其實都唔差，幾差都差唔過皇后餐廳。的薯條好吊詭 (我要快o的玩殘吊詭呢個字)，係完全唔脆o既，似係就咁解凍完就隊落個鑊度蒸咁！哈哈哈哈~

唔知點解好鐘意o的套餐有雪糕或者羅拔臣粉開o者喱送，其實都唔係好食 (牛奶公司雲呢o拿雪糕可以有幾好食？)，但係有我就覺得好抵o羅成件事，唔好問點解。影相果時食o左一啖先記得影，溶溶地。

連餐飲 咖啡 或 茶，兩杯。

呀，我覺得服務好o左，o的阿叔有禮貌o左，好事。

埋單連加一$150。

p.s. 見門口有個大 menu 寫住有個「2046 2人套餐」賣 $204.6，lol。

－－－－－－－－－－－－－－－－－－－－－－－－

金雀餐廳 (嘩哈！個英文名好型！叫做 Goldfinch Restaurant Ltd.)
地址：銅鑼灣蘭芳道13-15 號地下
電話：2577 7981
菜式：港式西餐 (?)