尋晚訓覺之前，我同男友發現隻貓唔見o左，搵搵搵搵，又叫極佢都唔應 (因為平時叫佢都會「meow」一聲應我 或者 自己行返出o黎)，後來就響梳化底發現佢縮埋一角，唔知做咩好似好驚咁樣，咁我地搵支佢最愛o既毛毛棒引極佢都唔出o黎。
後來男友夾硬抱o左佢出o黎，一放手，又一支箭咁走返去梳化底。因為我地好眼訓，所以見佢無事就由得佢。
今朝起身，惡童推跌o左個文件盒，跌晒的野。我又捉佢入籠坐一陣監，咁佢又響度勁「meow」，我望一望，噢~個水兜無晒水，但係我明明係尋晚臨訓前先加水，不過算啦，照加。
求先 lunch 返o左屋企，一入門口，o依？乜地下有個夾食物袋o既夾仔o既？？？
推開個梳化─
一切o既謎團都已經解開啦！
(個兇手仲擺埋晒o的兇狠表情)
我隻貓偷o左我包豬肉鬆o黎食呀頂！
(見前文，整泰式沙律用剩包豬肉鬆)
所以，佢尋晚死命呢埋響角落頭係因為要遮住包豬肉鬆！！！
所以，佢好驚係因為偷o左o野知我實打鑊佢！
所以，o的水飲得咁快因為o的豬肉鬆鹹佢口渴飲得特別多！
包豬肉鬆呀成 $20 o架，我即刻掉o左啦，今晚仲要洗地呀頂~~~~
發佈留言