一週飲食雜談 (上)

太懶,已經 N 日無寫食評,所以襯男友訓緊覺我比較得閒呢就寫下啦~

4月8日,午餐,側魚涌一帶我最喜愛之拉麵店函館。

這個北海道風的鹽味牛油拉麵真是百吃不厭!超鮮甜粟米荵花,獨家秘制日式叉燒,爽滑彈牙靚拉麵,滾熱辣湯配上大片牛油~

嗦~嗦~嗦~嗦~嗦~嗦~

店主還奉上冰凍紅茶解膩,Oishiiiiiiiii~:em_35

「係呀係呀!係好肥o架!我知啦!」

每碗 $65,逢星期一全日 day off。

..........................

然後就這兩個小菜導致到我幾日都無乜心機再寫食評。

4月11日,9pm,乘 van仔在銅鑼灣渣甸坊下車,太餓,慌不擇路,盲中中去o左呢間上海小館一品香。一品香紮根老銅黃金地帶幾廿年,照計,應該都 OK 呀,點知就賴o野。

餓但食量唔算大o既我倆,點o左兩個菜飯套餐。

男友點的蝦仁炒蛋,只屬僅能入口之流,我佩服剝蝦殼果位仁兄,咁細隻蝦都咁有心機剝o既?!係大隻過蝦米o的o的o的o架咋~

再來菜心獅子頭,好唔掂!第一,佢呃我!係白菜仔唔係菜心,第二,果兩粒獅子頭有o的縮縮地o既味,應該係醋落得重手o左,你知啦,早幾日成28/29度,好驚o架嘛!:em_40 總之,好難頂!

最離舖係碗例湯,叫例水就差唔多,淡過滾水呀仲!:em_40:em_40

埋單都要$80,攪到我食完要即刻隊杯 XTC pistachio gelato沖下個口o的獅子頭餘韻~

..........................

4月13日,晚餐,又新來發,悶,無法,呢一帶o的茶餐廳真係好唔爭氣!

兩個客飯套餐,一個咕嚕肉,酸甜度適中,確係幾撚手o既,難怪《飲食男女》做專訪都有寫過下。

再來一個雲勝炒牛肉,我成日都諗埋o的無聊o野,會唔會係有條友叫做 Vincent 然後改o左條聖瓜做自己個名,anyway,呢味野係得手!牛肉唔係梳打之流,夠晒鑊氣!確係掂!

呀我唔記得講,我食飯果時已經係夜晚10.30pm,因為男友比佢個無良老細:em_40臨放工捉住唔走得,要等埋一齊先開飯,埋單又係約 $80。

---------------------------

函館元祖北海道拉麵
地址:側魚涌華蘭路4號惠安苑地下12G 舖
電話:2562 8706
菜式:日式

上海一品香菜館
地址:銅鑼灣渣甸街37-39號
電話:2577 9169 / 2577 8980
菜式:上海

新來發茶餐廳小廚
地址:側魚涌華蘭路4號地下12號舖
電話:2885 9991
菜式:港式

Designed by OddThemes | Distributed by Gooyaabi Templates