港媽與國民教育

(我知時事非這個 blog 的大部分讀者所喜歡的課題，不過 Sorry 我會繼續寫。)

下午抽了點時間上某親子論壇看看一眾港媽們如何看待最近鬧得沸沸揚揚的「國民教育」問題，看了一下午，大部分的港媽都是「支持要有國民教育課，但是內容必需持平，觀點不能單一；要加入世界觀，加入六四事件等。」此乃可喜，最少知道持平的重要性。(當然，國民教育課本身的教材就是絕對不持平，此乃後話。)

可惜有少部分的港媽們的評論，看得我實在搖頭甚至有想吐血的感覺。譬如說，就7月29日由一班中學生組成的學民思潮所舉行的「729．全民行動．反對洗腦．萬人大遊行」，隨隨便便 click 入其中一條 thread，都會看到讓人吐血的意見.....

(藍字為原文，隻字不改)

Anpanmama：Will not go!!!!家陣乜嘢遊行都俾班政棍扭曲, 唔想俾人利用!!! 
其實你不去的話，亦一樣會被人利用，你唔出聲當你支持。

醜樣豬：學民思潮政治背後係邊一個派?????如果係短毛,卓仁,旭文唔駛預我!!!!! 
會上網就多善用 Google，學民思潮是一班由 90 後學生組成的團隊，目的亦只有一個，就是「反對德育及國民教育科」，以撤回洗腦國民教育為目標。就算你不想一下一班小朋友有機不去打有波不去踢，暑假「流流」都走去示威，也想一下他們這樣做是為了什麼；就只是為了自己和下一代不想被人洗腦。有時候不是說「一定要有大人喺後邊教先識」，阿 C9 (用返呢個 forum 嘅 language)，你都唔識咁多嘢啦，吓話？

水草：我諗都係，呢班學生邊有錢攪咁多嘢，而且嗰D政棍逢中必反，仲唔借題發揮，輸打贏要咩
同上，對啦，最好好似「禮義廉」咁囉，食多啲蛇齋餅糭唔出聲就最好啦。

WChan：無政黨BACK UP, 一班中學生可以識得攪咁多野??
同上，咁多陰謀論又唔去查下背後係咩人然後 post 上個 forum 認叻？(港媽最鐘意認叻)

heichunmum：我覺得好奇怪，而家香港真係咩都一窩風，究竟話本野洗腦的人是否全部睇過？我係一個小五學生家長，但我相信我仔不會被洗腦，我仔學校一樣有放64坦克入城的片俾學生睇，我同樣不同意先推行後咨詢，我覺得這樣會壞事，洗不洗腦其實好在乎個老師點教，用什麼角度和材料，但如果未係所有人都睇過成本野，但俾人猛話「洗腦呀」、「共匪打到嚟呀」就盲目附和的話，同樣也是洗腦作用囉
假設你個仔真係咁醒目的話，我衷心恭喜你。但我記得我細個時都有同阿媽拗過「你講嗰啲同老師講嗰啲都唔同嘅！」呢個問題，而當時我亦真心覺得「阿媽講嘅都係錯嘅，老師教嘅先係啱嘅」；又，既然你覺得「一窩風反洗腦」，你自己又有無去睇過份教材呢？隱惡揚善，歌頌共產黨就是國民教育的大綱。

heichunmum (又係佢！佢唔係五毛 / 土共的話，就一定係真心膠！)：我想睇左本野先評論，講真，國民教育是一定要的，但用這問題抽水的大有人在，好似地鐵加價咁，d議員覺得馮加價必反就啱一樣，令社會缺乏討論空間，國民教育本質上係好，係應該推行，但教材的推行時間同教材本身就要小心處理，先推行後咨詢是不對的，而教材我沒看過，沒法評論，但社會現在一味「反洗腦」，在我看來都係另一種洗腦

blah blah blah blah.......OKOK，無睇過唔緊要，依家截埋圖比你睇呀！學毛爺爺書法呀！爹親娘親都不及毛主席親？！呢度係香港呀唔係北韓呀！！另，可按此連結下載《國情專題手冊--中國模式(國民教育服務中心)》的PDF。

n1775979：D人民力量係背後支持攪屎棍嘅所謂遊行就真係要小心. D人當你係棋子就冇謂啦.
同上，講來講去三幅被嘅「棋子論」。係喇，喺屋企做鍵盤戰士啦繼續！

如果你到這一刻仍然不覺得「洗腦教育」或者是「國民教育」是有甚麼問題的話，又可以看看以上這個 CCTVB 的新聞片段，訪問了左仔學校福建中學的校長黃均瑜先生還有校內同學，典型洗腦示範。

更多言論是表示只關心這個國民教育科是否需要考試，要不要計分......如果不計分，是不是就代表這些意識形態不會進入小朋友的腦袋呢？小朋友 (特別是小學生) 只是塊清潔的海綿，你給他倒污水他會吸收，你給他倒清水他也會吸收。無論你回家如何扭乾扭凈 (e.g.回家再作輔導)，污水過處怎會不留痕？如果計分，小朋友死記硬背下，只會入腦一如乘數表。

「共產黨是進步無私團結執政集團」，WTF！你講得出口嗎？

每一次，是每一次的遊行你都可以有一千萬個理由不去，腳痛啦、約咗人食飯啦，去玩啦、做嘢啦......但此乃危急存亡之秋，你不為自己，都要為了你的下一代著想，一班「紅底」學者為了獻媚於天朝，置莘莘學子於不顧；本質上，和生產「大頭奶粉」的無良商人根本沒有差別！同樣毒害下一代！必須全民反對洗腦國民教育，絕不能讓其急就章上馬！請支持學民思潮的 729 大遊行，用腳表達你的聲音！