不外如是

尋晚出城 (其實係銅鑼灣je~) 買洗衣機，係啦，終於的起心肝揀o左部啦，買o左部 $2XXX 惠而浦 (分 12 個月免息分期)，都仲平過我樓下間 PK 洗衫舖，其實如果唔係間衰o野成日洗壞我o的衫 (e.g. 大幅度縮水) 同埋磅洗超貴 (e.g.10磅衫要 $48!!!! 我一個禮拜最少都洗 15 磅衫)，我都唔會自己買部洗衣機。

OK，洗衣機講完，之後去食飯，行o左去登龍街，點解？因為平~ 大佬個市係咁跌 (搵o野賴)，加上剛剛買o左2千幾銀o野 (呢個先係原因) 唔食平o的點掂？

呢間泰成我想試好耐，平時路過一定見到好長龍，聽聞好 O，尋晚路過咁橋有張 2 人檯差唔多埋單，所以就入去試下咁 lor。

環境方面睇落好「地道 feel」，即係 up up dup dup ，食飯要張個袋擺響大脾果隻咁啦。有電視仔播泰文 MV。

仲係無乜胃口，兩個人只係叫o左一碟菜同一個飯o黎 share，我每樣都係食少少咁啦~ 搞到睇落好似好可憐咁~


豬頸肉炒芥蘭，好鹹，芥蘭唔夠新鮮，苦兼且有渣。


泰式海鮮炒飯，你都見到有急凍雜豆啦，咁你仲覺得有幾好食？

我見其他好多檯都有叫 炸蝦餅 同埋 香葉包雞，可能我就係無叫呢o的佢o地撚手o既o野啦，我覺得呢間o野十分麻麻地，完全係不外如是。

不過埋單只係 $75。

--------------------------------

泰成菜館
地址：銅鑼灣銅鑼灣登龍街36號登輝大廈地下
電話：2834 2500
菜式：泰式