蠔油生菜
做法：
生菜洗淨稍為灼熟就得，下蠔油，燒熱一湯匙油上桌前淋在菜上面。
(洗菜我通常會先用鹽水浸 30mins 或以上，作用是洗去殘餘農藥啊~)
洋蔥排骨
做法：
1) 一字排 2-3 條 ($16/半斤，個死豬肉佬揀o左條好肥o既比我，記得叫個肉檔果個人揀條瘦o的) 老抽，生抽，糖，乾荵碎，麻油少許醃 30 mins 或以上。
2) 30mins 後落生粉撈勻。(作用係先醃味後落粉鎖住o的肉汁)
3) 燒熱油鑊炒一輪o的排骨先。剩起備用。
4) 洋荵一隻，切條。燒熱油鑊炒一陣，見金黃落糖又兜幾下，落排骨，又兜幾下。
5) 加水，閂鑊蓋，中火，焗到差唔多收水就開蓋，落少少鹽，兜多幾下就 OK。
個汁用o黎送飯十分正，同樣做法適用於做洋荵豬扒。
另外小朋友林先生要求食腸仔，OK，所以又煎o左四條腸仔過佢，咁好彩有煎o羅，佢條友嫌三嫌四嫌o的排骨肥撩晒o的瘦o既食完就停晒手。如果唔係有煎腸仔我唔知佢食咩 食送 啦~
都話佢好難服侍o架啦！
唔係淨係我咁講o架，前晚佢家姐第一次見我咋，都有即刻問我佢係咪好難服侍，話佢乜都唔食o架，佢阿媽諗 食送 比佢好辛苦 (如果係我屋企，比我阿媽已經打斷我隻腳啦~)，以家做佢女朋友果個就慘啦~所以我真係好可憐o架~ 因為林大少爺食飯o的口味比佢媽咪寵壞晒！
煮飯呀都唔知買咩 食送 好，魚完全唔食，蝦唔食，蟹唔食，肥o既肉又唔食，連叉燒稍為肥o的o的o的都唔肯食，菜又唔係乜菜都食 (淨係食生菜)，仲要話唔食就真係一粒都唔肯食，成日又食剩晒o的o野要我執手尾。想當年呀 (早三五七年)，我煮飯無以家咁叻呀，炒條菜心咁樣o的 ex 都食得鬼咁開心啦，我見其他o的女仔係咁意煮個公仔麵煎隻蛋比條仔都鬼死咁感動啦！
佢？！食完連碗都未洗過一隻呀！
OK，呻完。
飯後果買o左台灣天桃，my favourite~
($17/4隻)
題外話。
好友 EU 早兩日同我講要提名我去參加「美少女廚神」，嘩~~ 真係睇得起我，但係千奇唔好呀~ 第一集果個女仔好似張柏芝咁款喎，點鬥呀~ 鬥輸o左又會比人玩又會比人講，咁鬼「糯」~
講開又講，果個節目好多舊魚。
唔明點樣可以化恒妝煮飯，都痴線，命都溶埋啦~ 仲有無真係識煮飯o既人會著到懶靚咁樣響個廚房做o野，西餐都或者得，中菜點呀？唔洗一陣就一頭煙啦~
得啖笑 lor。
發佈留言