尋晚做冬返阿媽屋企食飯，細佬 (23才) 話比我聽佢結婚，嚇死我。
仲要係好急果隻，農曆新年後就註冊。
細佬同佢女友拍o左3年幾拖，本來結婚都唔係咩奇事，但係我細佬就都仲係細個丫~ 咁我都有兜口兜面問佢係唔係攪大o左人個肚，佢又話唔係喎。
實情係，因為個女仔係國內女子，咁要申請單程o黎香港，係要結o左婚再排期申請 5 年左右。所以先至咁快結婚。
其實我阿媽就麻麻地 O 個女仔，因為唔係香港人，叫我細佬不如溝過個港女啦~ 我細佬就話o的香港女仔癲o架~ 成日發脾氣要人就！哈哈哈~ 都係o架~ 的確好多港女係咁~
同 時間，原來我好多兒時玩伴都結o左婚，全部都係 20才 頭果隻，大中小三個表姐啦，我有個細表哥啦 (叫表哥，其實都係大我幾個月)，連住我舊屋樓下果個男仔，我細個上佢屋企打紅白機睇漫畫果個 JY 都結o左婚，仲要生o左個仔o添！我有個細表妹都生o左個女，得 19才 添咋佢~
好大壓力，我阿媽尋晚已經喪問我幾時結婚，我話無錢結喎，佢又即刻話平有平結，貴有貴結 (...咁似我同某人o的對話o既？)，話你想搞o的豪華婚禮儲一世錢都儲唔到啦~ 我話要去o的屋村酒樓擺酒就幾大都唔滯，零願唔擺！
講返細佬果筆，我都唔知要送o的咩比佢，我問佢有咩想要，
佢：不如你送層樓比我啦~
我：食懵你呀！
佢：咁呀...咁送 Benz 啦~
我：.....
所以我都唔知送o的咩比佢，問阿媽，阿媽話擺酒先係送金器，咁註冊又送o的咩好呢？有無人識？
感覺怪怪的，無啦啦有多個人叫我家姐。
講比男朋友聽，
男朋友：你比你細佬扒你頭喎~
我：其實都可以唔比佢扒頭o架~ 嘿嘿嘿嘿嘿嘿~
即刻無聲出 dead air！哈哈！
發佈留言