恐怖片

(本文打的比較混亂,廣東字較多,外地的朋友請見諒,我心很急的時候也顧不了文法啦。)

今晚的《星期二檔案》,是我看過最恐怖的恐怖片!好恐怖!我是驚到真的眼濕濕,真濕果隻。


《中女告白》1/4


《中女告白》2/4


《中女告白》3/4


《中女告白》4/4

今集主題講「中女」,正確點來說是「剩女」或者「敗犬」,訪問一班有經濟能力、20到尾至40歲的女人,點解,無男人要!

嘩我一路睇一路驚,慘了,我也是一枚中女喎 (28歲都比人叫中女o架啦依家)!我都係 single 喎!仲要慘到人家就算無男人都有錢,我又無錢又無男人,連做「敗犬」都唔 qualified 喎!

被訪者一堆,看了更是覺得自己好大鑊,而且係「好很大鑊」:有能力如地產經紀女強人 (33 歲有 3 層樓揸手,我連一格階磚都買唔起);美女如空姐 Queenie;聰明如美女電台主持彭晴,個個都單身!!哇我呢o的靚又唔夠人靚又唔後生又唔青春又無身材又無錢連性格都唔多可愛,是否死得?

* * * * * * * * * * * * * * * * * * * * * * * * * * * * * * * * * *

看了節目很感慨,突發性抑鬱來襲。

在 MSN 的 status 寫道:「睇《星期二檔案》睇到眼濕濕。」

好姊妹 X 先生 5 分鐘後立即來電安慰,怕我胡思亂想,「喂妳都要擴闊下妳生活圈子,多o的溝仔先得o架嘛!」

我都想!但係去邊度識先得o格??

以下是本文的中心問題,就是,如何認識多o的(正常)男人?

A) 工作地點?不可能啦!我公司全女班,加上我一向認為「響果度食唔好響果屙」,就算溝個客,都唔好。

B) 揾o的興趣班讀下?N 世紀前我在法國文化協會讀法文,大約 20 人一班,19個女生,1個男生,男的還要是陪女朋友來上課,仲要好明顯係被逼果隻。......OKOK,唔讀書,定還是你覺得上跳舞班會比較有機?

C) 做運動?嗱嗱嗱,我有做 gym 有去 gym room o架,不過唔知點解成個「加州」都係 gay 佬之嘛。

D) 做室外運動?這個我實在抱歉,游水羽毛球網球足球籃球桌球......我通通不會。

E) 蒲?咪玩啦,成場嫩口脆卜卜十八廿二 cute cute 妹妹,比人叫做 auntie 就無謂啦。(well,想當年我十八廿二時都的確覺得 30 歲係叫做「好老」的,現在知死了。)

D) 打機?OK,我的確知道好多男人有打機的習慣,不過我應該玩咩 game?難道玩勁舞團嗎?

......好啦,你答我,應該怎樣做?
發佈留言
Designed by OddThemes | Distributed by Gooyaabi Templates