CEO Gateau

承前文,兩塊菠蘿加條蕉,怎麼能滿足我們幾個「生大食癪」的大胃納之人。

可惜銅鑼灣區食肆林立,要找家好吃的甜品店卻不易,如滿記、發記等「頹爆」之流,有得揀的話都盡量唔想揀。ZOE 餅好食卻收得早,這時有人提議去 CEO 吃甜品!o下?CEO 有甜品食??唱 K 果間 CEO Neway 喎???

都說香港做生意的頭腦靈活,這家 CEO Neway 地面那層面積大,於是其老闆就將地下角落改裝成甜品咖啡小店;說是改裝,其實也不過是加個水吧,擺個雪櫃,加幾張桌子和沙發座椅湊合湊合。圖片中的小桌自成一角,就是放在那迴轉樓梯底下,轉角還可以打兩鋪 PS3。

友人說是在飲食雜誌上看過報導,說是這裡賣的西餅蛋糕,是位有 40 年經驗的老師父做的,而這位老師傅更是最近紅爆的九龍城 Tony Wong 和新架坡 Pastry Alliance CEO Kenny Kong 的師傅,在香港 Hyatt 及北京 Landmark 酒店當過行政餅廚......云云。

聽落好勁。可惜有句說話叫做「越做越回塘」,四十年經驗又如何?好食的話做過四日都好食,唔好食,話之你做左四百年啦。

蛋糕選擇不多,我們五個人揀了四款,還有悉數飲品。先來一件冧酒提子拿破崙,賣相都已經少少頹,食味,仲頹,那件酥皮又濕又韌,蛋糕品質水準非常平平。老實講,屋村麵包舖做的拿破崙,一定好食過呢件「o野」多多聲,不過人家賣 HKD$8,這裡賣 HKD$28 囉。

Apple Crumble 全晚唯一叫做比較好食,正確點來說是一堆唔好食之中揀好食,所以比較好食。本來都無甚麼問題,如果是熱食的就好了。

濃朱古力蛋糕有 cut cake 有原個一磅裝賣,正常味道,不過巧克力的材料是吃得出來好 cheap 那種。我不是說定必要用 Valrhona,不過你收我 HKD$30 件,交這樣的貨色給我?怎麼樣都說不過呀!

消費滿好像是 HKD$XX 會蓋一個印,儲夠幾個又可當 HKD$30 使用,我們人多,一吃就夠數。見之前幾件蛋糕都不對路,「拿拿林」拿出來一拼使用。健健選來這件 lemon tart (HKD$32),檸檬餡料是好吃的,似小時候吃的檸檬夾心餅那層檸檬忌廉。餅皮,見到都唔開胃。

飲料方面,四個人都是喝瓶裝果汁,司徒先生點了一個凍焦糖咖啡拿鐵,據說相當難飲,焦糖味和咖啡味都不足。這時一位經理模樣的女子問我們飲品的意見,司徒先生表示咖啡不好喝,女子表示可以再沖過一杯,再沖來的那一杯又果然好一點,對,是好一點,仍然是不好喝的。經理前後兩次來問意見,都是問飲品的,為甚麼不問蛋糕呢?蛋糕做得好差啊!

瓶裝飲品/果汁每支約 HKD$20,蛋糕約 HKD$28 - 50 件,咖啡 Starbucks 價位。服務如何殷勤都好,絕不會再來。

------------------------------

CEO Gateau New
地址:銅鑼灣糖街2-8號CEO地下
電話:2137 9777
菜式:西式





檢視較大的地圖
發佈留言
Designed by OddThemes | Distributed by Gooyaabi Templates