呢個之前寫漏o左，我覺得一定要寫返。4月12日，返娘家晚飯，終於有o的住家飯食下，阿媽蒸o左條魚炒o左碟菜心，同埋煲o左煲魚肚猴頭菇靈芝菇乜乜菇藥材豬展湯，o的魚肚好正，o拍骨膠原入口係咪正先？！！！唔好講笑！食完即刻靚o左呀！
掂呀！
．．．．．．．．．．．．．．．．．．．．．．．．．．．．．．．．．．
4月14日，妖，即係前日啦！太古城 food court。
慕名食o左南翔小籠包，呢度 food court 好勁，有佢間 2nd line 南翔饅頭店，但係呢籠o野唔掂喎喂！一籠六隻，得一隻有湯汁！其他果o的都乾爭爭~
呢個就好o的o的啦~ 蟹粉灌湯包，索價 $23，湯確實幾好味，又有一條條o既瑤柱絲，足料，不過塊包皮 (笑) 唔掂啦，好硬~ 食之無味，棄之可惜。
賣小籠包果位女子十分之無禮貌又黑面兼且極度大聲同埋惡，可以的話，都盡量唔好坐近佢。
當然兩條友食果幾粒小籠包又點會夠喉？
再去 Munch 買o左極正之有機菜沙律兩兜。$10@。
吞拿魚焗螺絲粉，一樣都係水準之作，掂！再加兩杯 pepsi， $7@，計計埋埋都接近 $100，真係貴。
食完3點，歸家洗廚房去~
．．．．．．．．．．．．．．．．．．．．．．．．．．．．．．．．．．
話說星期五晚我同男友趕工洗廚房，當晚中場休息就係去o左竹源食越南o野，另一間值得推薦o既平靚正食店。
7pm 已經全場爆滿，要食就襯早。
蒜蓉炒西蘭花($30)，因為唔當造，西蘭花色水比較黃，不過依然都係鑊氣之作呀o下~
咖喱牛腩飯 ($26)，咖喱 OK，偏甜，牛腩都夠淋，最正係入面o的牛根，嘩~ 又大條又淋入晒味！同 Doraya o既牛根煮有得揮！
淨係望都覺得好食，大大碗o既生熟牛肉河 ($22)，一句：無得頂！！成兜o野都係水準之上，湯底－掂！牛肉－掂！洋蔥芽菜－掂！河粉－掂！最緊要，平！！！！
我個人十分之推薦呢間o野~
－－－－－－－－－－－－－－－－－－－－－－－
南翔饅頭店 / Munch
地址：太古城三樓美食廣場 Food Republic
電話：TBC
菜式：上海 / 西式
竹源越南餐廳
地址：側魚涌英皇道939號地下
電話：2561 5151
菜式：越南
發佈留言