又來家常小菜時間，時間有限，只能夠有時間做好一送一湯(夾硬計埋湯渣就有兩送 lor :p)。真係唔知o的阿媽點樣放工仲煮到三送一湯 8pm 開飯。
今晚o的送全部都好平！ 
先來這個秀珍菇炒雞柳，秀珍菇 $6 / 半斤，雞柳 $2 / 2塊。
(1) 秀珍菇洗淨，備用。雞柳洗淨，用生抽，老抽，糖，麻油，生粉調味，撈勻，擺埋一二邊醃半小時。
(2) 先略煎雞柳，煎好瀝油備用。
(3) 開鑊，爆蒜蓉，拍薑一至兩片，落秀珍菇，落小小鹽，炒一陣，再落雞柳，蓋鑊蓋焗一陣，秀珍菇會出水，所以千奇唔好落水呀！
(4) 蠔油，豆粉，生粉水撈勻，打獻。
(5) 等個汁收得差唔多就上得碟。(我鐘意汁撈飯所以多o的汁)
男友勁讚呢味，食晒！呵呵呵呵~ 
‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧
呢個仲簡單，不過好好味！又係好平！
聖瓜蝦頭蝦乾肉碎湯
聖瓜 $2 / 一條，免治豬肉 $5，蝦米，蝦頭 (前晚整沙律淨返)
(1) 豬肉略沖水，廚房紙巾索乾。鹽，麻油略醃。
(2) 聖瓜洗淨，滾刀切塊，備用。
(3) 蝦米洗淨，熱水浸軟，備用。蝦頭洗淨，備用。
(4) 燒一鍋水，水滾拍薑一片，連同蝦米蝦頭一切落先滾 5-10 mins，再落豬肉，滾 5 mins。最後先落聖瓜，滾 3-5 mins 即成。
一粒鹽都唔洗落都勁鮮甜呀！
‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧
成餐飯最貴就係小妹o既人工啦，無價o架！嘻~
不過今晚呢就唔得閒煮飯啦，有錢要賺！haha~
發佈留言