繼續大堆頭食評。係，我認我懶！
星期五晚，新來發。
沙嗲汁脆皮炸雞($65/半隻)，皮炸到紙咁薄，極脆！雞肉亦係極滑！我本人覺得比起香港大學校友會果隻古法鹽焗雞更正！
西蘭花鮮魷，亦都不俗，西蘭花好爽甜。
不過埋單唔平，叫兩個靚仔再搭兩杯凍飲，埋單約 $150，幾好食都係茶餐廳咋喎喂！
．．．．．．．．．．．．．．．．．．．．．．．．．．．．
星期六同星期日午餐，都係新來發 (連食三日！！！！=_=)。懶到淨係叫外賣。今次就試埋出名果個鮮茄湯底豬扒麵($26)，果然好掂！好食過同樣以蕃茄湯底掛帥果間尖沙嘴星座冰室，真係好掂！！ 可惜我心急得滯無影相~
．．．．．．．．．．．．．．．．．．．．．．．．．．．．
星 期六晚，同男友o係銅鑼灣一齊剪完頭髮去行街，上 SOGO 旭屋睇書，男友叫肚餓，正好順手試下呢度 12/F 間餐廳，初頭都諗住係日式西餐，點知有驚喜喎！！裝修環境比較暗，但係唔叫靚， leung leung o地果隻。menu 寫明呢度係無 MSG 同埋用橄欖油煮食，set dinner 由 $98 至 $200 不等，豐儉由人。
starter，煙三文魚海撒沙律，o的菜新鮮就好食o架啦~ 呢度o既菜就的確好新鮮啦！可能近水流台，樓下就有 SOGO supermarket 嘛~
龍蝦湯，都 OK 不過無 surprise，同埋有小小煲「火農」o左。
北海道鮮帶子配波椒汁扁麵，強列推薦！！除o左賣相靚之外，帶子亦都係勁新鮮同好大粒，波椒汁香口惹味，而且份量都相當大，男仔食都一定夠飽！
煎龍利柳菠菜汁天使麵，好香橄欖油o既味道，龍利又係新鮮！天使麵先係難得，al dente！！彈牙兼唔會痴埋一舊！呢下先係功夫呀！
甜品要另外加 $35，我o地要o左個軟心朱古力布甸 share，呢度呢個就不過不失，o的漿爆得唔夠勁。
咖啡就一般啦，唔算差，但唔叫好，比較偏淡。同埋我好耐無見過黃方糖！
除o左 waitress 比較 passionate 得滯 ( 可以叫做好 pushy o下~)，不停 sell 我o地食海鮮，overall 都十分值得試下，點都抵過食o的上樓 cafe 仔啦~
埋單連加一約 $290。
．．．．．．．．．．．．．．．．．．．．．．．．．．．．
星期日晚，旺角掃街！！
先 係食左一串燒賣($5)同賣一串台式香腸($6)，再去日之船食章魚小丸子($12)，然後仲試o左新果間土方燒餅皇，賣點係湖北o既土法燒餅，旺角o的 街邊小食真係越出越神奇！試o左皇牌豬肉燒餅($10)，都係因為勁多人牌隊先想試下，可惜唔太o岩我口味，餅底唔錯，酥軟唔痴牙，可惜秘製豬肉o既香料 太重，我覺得好麻麻。
之後仲竟然食得落新廣南o既海南雞飯2人套餐，嘩，我覺得我地兩個好強！今日o既海南雞飯表現亦唔錯，不愧為我本地最愛之海南雞飯(本來尖東好時沙嗲先係我最愛，可惜佢 service 太差，已 black listed) ，例湯又好味，連飲品先 $90，平到嘔！
不過我相信呢種不停出街食o既日子唔可以再捱落去，好辛苦呀成日都出街食，我好想煮返飯呀！！
－－－－－－－－－－－－－－－－－－－－－－－－－－－－－－－－－
新來發茶餐廳小廚
地址：側魚涌華蘭路4號地下12號舖
電話：2885 9991
菜式：港式
Reflexion Natural Dining
地址：銅鑼灣軒尼斯道555號崇光百貨新翼12/F
電話：2831 4866(建議預訂)
菜式：西式
新廣南餐廳
地址：旺角上海街631-633號地下
電話：2395 0695
菜式：南亞
發佈留言