正確o的o黎講係 purple carpets， 因為今屆金像獎係紫色地氈！
多謝 Si Yee 兩張 VIP guest pass！！比猿人店開張 invitation card 更難入荷啊~！！
人生中第一次的去如此盛大之 function，當然要打扮得靚靚靚靚靚靚靚啦~
(所以煞有介事地無啦啦買o左一個 Prada evening bag 襯衫同一條 Prada 呔比男友 :p)
又好彩真係著得咁行，因為眼見o既所有人都係行到爆，絕對無失禮 now.com o架我！
．guest pass，內附地圖一張，基本上，無人能夠睇得明，唔知咩人畫的，連的士司機都唔知佢畫咩。
．一落的士，就上接駁專 Van (同車勁多o的西裝男人)，一落車就行地氈！我係完全無望到鏡頭。
． 行完地氈就去酒會，企自己隔離左右全部都係星，有 Paco，有吳京，有 Miki 有 Theresa，有馮德倫 (報紙唔寫都睇唔出佢係全身 LV，個 Look 勁 70's) ，有一家三口都勁行o既鄭佩佩 / 原子惠 / 原麗淇，Marsha 真人好瘦無上鏡咁大隻，靚到爆但係皮膚麻麻o既周迅，唔知范冰冰定李冰冰，惠英紅，任達華，林家棟，鄭中基，森美...等等，但係其實大家都係企響度唔知 做咩，呀，Miki 真人幾靚，好多人搵佢合照。
．個 stage set 好鬼靚，果然電視睇同 Live 睇分別係好大！
．我好憎o的 fans，個鏡頭一 pan 住 劉華 / 姐卵 / 鄭秀文就係唔係都尖叫，大佬呀，台上面其他表演者唱緊歌o架！！識唔識尊重人o架？！
． 關淑怡同蔡琴出場我都打冷震出雞皮 －－ 係好聽到好感動先有o既反應啊！蔡琴唱《給電影人的情書》時我直頭係有想喊o既衝動 (不過就當然無真係喊，因為好似誇o左o的)，o的歌詞真係殺死我，對上一次能夠有歌咁 touch 到我已經係張學友 cover version《小城大事》。
．黃凱芹唱歌我都打冷震，佢o的 80's 台風好得人驚，仲有件玫瑰花恤衫，o依~~~~~~
．賽果合理，除o左男配角獎，唔係話秋生唔好，不過如果我係大會做馬都做比智叔啦，人地早兩日先死o左個仔都o黎呀，同埋《殺破狼》入面佢真係做得好好喎！
．杜 sir 好o野！Hip Hip Hurray！《黑社會》立晒o的大獎！夠薑到真係成 team 人都無o黎！
．成晚係咁搭的士，因為我對 Pierre Hardy 個「爭」勁高(4吋！)，肉同腳都好赤，屋企 > 紅館 > 蘭桂坊 > 屋企。淨係的士錢加埋都$300！
．睇完 show 食飯，11pm，餓到爆。飛的落蘭桂坊間翠華，因為我相信佢係全香港唯一一間無論你幾奇裝異服都無人望你o既茶餐廳。
我食XO醬海蝦球蝦子撈豆腐麵線，咁夜都有新鮮大蝦球，真係捨佢其誰？
男友食豬軟骨撈丁，又係好好味，翠華任何時候都比其他茶記高幾皮！
食完唔夠喉，搭多個腿蛋治 share，咁就o岩o岩好啦！叫多兩杯o野飲，埋單 $120。
(照片已刪除)
．最後呢張相呢，因為阿俊男男友死都唔肯出鏡，所以唯有打格仔啦將佢個樣，難得有張相影得我咁靚嘛，梗係 post 出來與眾同樂啦，嘻嘻嘻嘻嘻嘻嘻~ (都 OK o架我自己化o架個妝！)
特別鳴謝 － 好男友 A 先生，Si Yee，友人 A 小姐提供 Prada discount，夜媽媽都開仲要好好味o既翠華。
－－－－－－－－－－－－－－－－－－－－－－－－－－
翠華餐廳
地址：中環威靈頓街15-19 號地下至二樓
電話：2525 6338
菜式：港式
發佈留言