回應,有感而發

有人說人紅易惹是非,不是我謙虛,但我總覺得世界那麼大,我不過是博客世界裡的一枚小薯頭,說到紅,還有很多人比我更紅;你說你真的紅呀,香港來說,嗯,還好,但莫說地球,光是一個台灣,最當紅的博客每日流量一定比我還要多 N 倍,更不消提人口斷億計的神州大地。

有關這件事的最後一個回應,法律追究的權利我依然保留,我重申我只是枚做自由業的死窮鬼,但我還是會為了保護自己的名聲,拼了我的銀行戶口也得找律師。畢竟,每個人都要為了自己所做過的事所說過的話負責任,現實世界如是,網上世界亦如是,不是說你匿名用個網名,就可當無事發生。誹謗,是很嚴重的罪行。

當然,暫時我是不會再看該個 Forum (其實從來都沒有看 BE,我看的本地 Forum 只有高登,下次要誣蔑我,去高登吧!我天天看。),反正跟那種腦殘的人爭辯是無結果的。辯贏一個腦殘的人?有甚麼好值得高興?

所以,不用掛心我,我很好,沒事。多謝所有人的支持,多謝你們每一個的留言。

* * * * * * * * * * * * * * * * * * * * * * * * * * * * 

不如正經討論一下收費的問題,確實是因為該個 Forum,這兩天我真的在想,是否真的應該收費?

在品牌任職的 PR 小姐 / 開廣告公司的前輩 / 做 Marketing 十幾年的朋友,異口同聲問我:「為甚麼你竟然不收費? 」前輩朋友甚至話,「你咪戇居囉依家,無收都比人當有收。」

朋友舉了個例,譬如話,「你老公跟另一個好索的女人一齊在一間房裡面,鎖埋房門幾個鐘!真係齋瞓,無搞........但你會唔會信佢地真係唔搞?咪咁天真啦!」

係囉,咁 X 戇居咁天真,點解呢o下?

喂,雖然收到一大堆的 Free Product,但那些不是「現兜兜」的錢呀!其實我都要交租要開飯,我去 event 都要搭車,搭車都要錢o架!折墮o的講,我揾地方擺,果o的地方唔係錢呀?地鐵又話加價,我個業主又話加我成 20% 租!我又無正經工作年多了.......嗚...............

OK,我知以自己的流量,要收費,絕對不成問題;即便是某些比較有名氣的從事寫作的人,早就有對商戶收費,那個也不是甚麼商業秘密。

但辛苦建立得來的誠實名聲,如果收費,會不會就一瞬間被瓦解?(好似某些食評人那種,現在都沒甚麼公信力可言) 會不會可以找到個平衡點,即是我就算收,但我又可以做到公平公正,如果商品或餐廳有不是之處,我都可以如實照罵不誤?係!好難,兼且聽落去亦都無可能。

當然在找到這個平衡點之前,我還是不會收任何費用的,如果有收,我還是會在這裡如實相告。

好頭痛。

香港現在的 Blog marketing 是這樣做的:商戶當這些所有的 Blogger 都是 Press (一般傳統媒體,不計 Advertorial 或廣告)。有些商戶會找 PR/Marketing 公司找 Blogger,PR/Marketing 公司當然有從中收取費用。但大部分的商戶都是當 Blogger 是傳統媒體,即是送商品甚至請食飯,但絕**不會**給現錢 Blogger (OK 對我啦下,我都知有收費 Blogger)。

問題是,記者編輯為你的商品寫字介紹,因為那是他們的工作,而那是**受薪**的。Blogger 為你的商品寫了字,時間花了,但時間對 Blogger 來說的 Cost 其實比商品本身大得多,而商品對商戶來說只是有限 Cost 呀!亦不見得有讀者肯付錢給 Blogger,變相那即是 Free PR,為他人作嫁衣裳,仲要係完全免費 Totally Free 果隻。

現在美國是有設立法例規管這類 Blogger 置入性行銷的,類似是一定要標明商品來源之類。不過香港和台灣都未有這類法例規管,所以我完全理解讀者會對某些收費 Blogger 收了錢但扮自己買扮真心分享十分反感;將心比己,我都會好反感。

另外,有微博童鞋問:該如何介定何謂 Blogger?是否有個 Blog 就叫 Blogger ?引申下去,又或者有幾多讀者才算是 Blogger?而讀者當中又有幾多是 influencer 才算是成功的 Blogger?也是個很值得討論的問題。

以上寫得十分混亂,因為我個人都十分混亂,抱歉。

大家可以隨便發表意見討論。

補充:讀友 S 提到公信力的問題,的確今次 Forum 事件讓我其中一個好大反應的原因是,我辛苦 build up 出來的公信力,被人質疑兼監生「老屈」;要知道公信力非用錢能買,所以收錢與不收錢,其中一個讓我很頭痛的課題是,如何做到魚與熊掌可以兼得。

補充 2:另一個我覺得 Blogger 是可以收錢的原因,商戶之所以找 Blogger 去做這類商品推廣,除了因為 Blog 本身已經是另一種的媒體 (Media) 之外;是因為一般的客戶經過多年的傳媒廣告洗禮,覺得 Blogger 的口碑或者試用報告才是信得過,能夠成功直接促銷商品,比做傳統廣告效力更高更快。而基於這個有加倍效果的能力,我覺得收費本身是可以成立的。

補充 3:為免被人惡意抹黑,利益申報:除了收取免費商品,本人曾經為白蘭氏燕窩及Dove Chocolate 寫網上專欄是有收取稿費,現《新Monday》的愛情專欄亦有稿費,不過《ELLE》的 Elle Blog 則是無錢的,所以我寫得好懶,無錢我都肯寫咁蝕底?係,當答謝 (?) 早年贏了 Blog Queen 去了個峇里旅行 (我都唔怕寫,同期《ELLE》的對手《Coxxoxolitan》都有找我寫,但因為我早早答應了《ELLE》,明明《Coxxoxolitan》有稿費有得賺錢我都推了!);早一兩年 Biore 一系列的卸妝品及某幾個品牌,因相關商戶事先會要求拿我寫的 Blog 分享刊載雜誌作廣告,故我亦有收取悉數版權費用。當然我知有些 Blogger 知道有品牌拿她們的照片刊載雜誌就歡天喜地不計酬勞,但那是閣下辛勤寫出來的作品,無必要給商戶拿來登廣告賺錢。網上免費分享 =/= 免費讓商戶登平面 或 其他媒體廣告。

補充 4:不止一個美容品牌叫我「幫手」搞團購,說是可以讓我從中抽佣,我全部推掉,甚至將來,這裡都絕對不會為其他人賣任何一件產品。第一我不是一個對數字很敏感的人,又要收錢又剩,我做不來;第二就是一賣東西整件事情就變質,我無賣,但好多人有賣,前車可鑑。

補充 5:(香港 Blog Marketing) 我的處境可能多是直接跟品牌本身 / 公關公司聯絡,但亦有不少的博客都是要透過一些網站平台或者某些人才會拿到試用品禮物,你歡天喜地寫,他歡天喜地收錢;但亦正如讀友 Angie 留言,商戶本身是有 budget 搞活動,「中介人 / 網站平台」搞這些送禮活動當然可以從中獲利,只是無落過你個袋。你唔係諗住人地咁大個網站要營運係真係做義工咁做下嘛?

(哇頂,我咁樣吹下吹下我都可以撈 Social Media 呢行囉,係爭在未去 Wiki 抄幾隻 marketing 專業字扮 Pro。)

28 則留言:

S 說...

其實如果真的是收費,就是說明收費好了,就如係平日為一些產品打評論一樣。當然,如果不收費,公信力一定會大一些。但是,既然去到這個"明明冇收,又被屈話有"的地步,何不收費?!列明說之好了!我相信你總不會以後只介紹收費產品給我們吧?! 做好人,還是討好不了所有人,倒不如討好自己算了。支持你的決定。

素顏天使™ 說...

S > 謝謝你,已在內文回應。另,**假設**我將來真的收,當然不會只推介有收錢的產品,我過不到自己那關。

Fa 說...

你有寫清楚就 ok
我都想你多 d 錢駛 哈哈

Beanzzzz 說...

素顏其實我睇左你個Blog好耐。我記得年幾兩年前因為某D人既留言令你差d shut down呢度,不過最後你都係選擇留係度。

今次呢件事好明顯係有人想砌你生豬肉,你寫咁多篇entry,邊篇係有sponsor,邊d野真係自己比錢買既大家都一定睇得好清楚。唔好因為呢d小事而影響到呢個blog呀,誰對誰錯真係大家心照啦。我成日都因為你推介而買果d product架 LOL

利益申報:我都係高登巴打 #bye#

素顏天使™ 說...

Fa > 謝謝妳的意見。

Beanzzzz > 高登巴打 #yup#

你放心,我一定唔會 shut down 呢度,我唔會捨得,事關我是一頭「網精」,乜叉都要擺上網講。同埋我依家 EQ 高左架啦,係!的確會唔開心,但想我摺,好難啦!:o)

Carrie Mak 說...

你說得對,真的收費後,如實報告應該很難的。

香港以外,好多blogger都收費,看官仍會相信對方的言論出自真心。
雜誌介紹、藝人醫生代言也收錢,大家反而相信?雖然很多blogger不理信譽、埋沒良心,但仍然有很多blogger是真心分享的。看官需要的是一個腦去看去分析去親自嘗試。

為什麼香港的blogger收費,就好像一定會埋沒良心(其實沒收費的也會埋沒良心)?很多blogger花時間雕琢文字,用心機去拍照,甚至去拍片,卻分文不收,為的真的只為興趣。

Angie 說...

有心,有力,有時間的Blogger,會利用*餘暇*來和別人無私分享,收不收錢,當然不是問題,但收錢當Extra money的,亦大有人在。但正正就是這個原因,PR就會Abuse了(如果這裡有PR看,Sorry,明白你們的苦況,因為真正收了佣的是你工作的機構),他們會傾向沒有要求收錢的Blogger免費為他們宣傳。

然而,就是因為有一些不知情/知少少的人,基於眼紅或種種原因,就會屈一些沒收錢的人,企圖以「他們都是烏合之眾」的理由,讓自己好過一點。

你可能會說,品牌送出產品,不是等於拿了錢出來嗎?但請留意,Blogger用得好,自己會真金白銀買,亦會叫人買,品牌是完全計算過,才拿出Sample,而且真的只佔他們Pormotion budget的很少部份!

我在傳媒工作,我們是受薪的,公司亦有指引不讓我們收受利職,但我看得出品牌/PR花在我們身上的錢一點也不少。

既然客戶有Budget,而這亦是一個合理的幫補,收錢,有何不何?我相信,有適當及清晰的指明,你的粉絲並不會因此不看你的文章,或作出其他判斷。

無論如何,我絕對支持你的決定,及會看你的文章。

烈婭 說...

hey I have been reading your blog for a few years...you are one of the few bloggers whom I have followed for so long. I used to read some of the restaurant reviewing blogs but now I just don't feel like reading them anymore because their posts are merely advertisement as opposed to honest reviews. but I have never doubted the honesty of your blog!
please don't be bothered by those "mo liu" people! support you!

SZE 說...

假如,將來你真係收錢,但遇到果D堅係唔好用的產品,咁又要點處理?或者你會退返D錢比佢地,仲比埋果個Free product當自己買左佢。但果間公司可能為左宣傳果個產品已投入左其他成本去配合你篇文。到時條數就唔只比你寫文果條了,果陣時又會點計呢?到時可能令你相當頭痕。

講真我覺得收錢無問題,睇你個blog咁耐都知道你唔會寫流野,不過收費寫就變了責任,所以要考慮更多。

ShU 說...

略略睇過下佢地講咩, 真係好腦殘。最可怕既係話埋人地屋企+職業... 老實, 雖然某間公司既博文真係多左啲, 但, 唔覺有咩問題, 亦都信你冇收錢, 請你一定要繼續寫同唔好嬲!亦都支持你透過法律申訴!我覺得人係要為自己講既野負責任!!!(某位女士講職業個part, 我相信無論任何一個女人都會覺得好嬲!!!!!!!!(我唔係咩粉絲, 甚至連讀者都唔知算唔算係, 因為只係間唔中入黎睇下, 但見到果2隻字我真係好嬲!依家啲人真係咩都講得出!))

P 說...

我記得幾年前我哋第一次私下通訊,就係呻被讀者話我哋寫啲嘢唔可信。

但係一間餐廳維持水準與否、另一使用者膚質適合該件護膚品與否,根本唔係我哋的控制範圍內,但總有人覺得「妳寫好用,我用唔得,妳一定係收咗錢 / 唔識嘢」,再後來甚至有人會覺得「妳唔係收咗錢妳邊消費得起呢啲貴嘢」

我相信我同妳最初寫網誌,其實都只係想寫,冇諗過咁複雜的問題 -- 利益 & 公信力。

但慢慢多人睇,亦開始有試用邀約,問題就慢慢浮上檯面。

妳比我人氣高好多,所以妳遇到類似問題應比我密得多。

我覺得我哋好難討好所有人,但求無愧於心便好。

(唔怕坦白,我聽過有人傳話我黐埋妳度唔知博乜,有啲人真係乜都講得出架,唔理得佢哋咁多)

以上是作為同是 blogger & 朋友立場講的。

***********************************

以下是作為 妳網誌讀者一員 而講:

睇咗妳網誌都有好幾年,之前都有睇其他同類網誌,到最後好多都冇再睇,只睇呢度。

有啲網誌唔知佢有冇收錢,但寫得一面倒只讚好,用字亦好 press release,爭啲以為佢拎起本雜誌照裡面啲廣告照抄。

但妳唔係咁樣,作為一個搞文字出身的人,我想「hea寫、有心寫、真心寫、收錢寫」其實唔難分到,只係總有文盲睇唔出咁解。

如果妳搵到兼得魚與熊掌的方法,我真心覺得收錢冇問題,畢竟妳值得收這個錢,這是妳花了很長時間累積回來的。

作為一個正常人,實在諗唔到理由要人哋窮來成就自己爽的。

shir 說...

早前台灣知名blogger才因寫野不真實而引起很大話題, 我也有看那blogger寫的美容流行blog, 後來知道佢地收錢寫野真的很反感, 反感不是收錢, 而係佢地每次都無講明係收錢寫稿, 而係扮自己大出血買依樣野樣, 什麼「又敗家了」, 「燒很大」, 所以現在再看真就好似睇advertorial咁樣, 完全唔會再信. 以前佢地還未收錢寫時, 喜歡看是覺得她們有一定的風格, 品味, 但去到後期簡直係咩都接, 咩都寫, 同以前既style完全唔同 (台灣有些還是全職blogger, 寫blog寫到工都辭埋全職經營blog). 我明白要經營一個blog需要很多時間心血, 公信力也是努力維持的, 兩者拿到平衡網友還是會支持呢!

K先生 說...

真係俾班腦殘友吹到啤一聲,好高興見到妳已經無嬲,撐妳呀!天會保佑好/靚人的.

nnomore 說...

我係男人唔會買cosmetics但我都會睇晒你個blog,因為我中意你夠真有血有肉同埋譴詞用字中嘅用心同率性,好似呢次咁
如果一個虛偽人,駛鬼寫成2篇文詳述想收$與唔收之掙扎兼喺weibo爆粗咩,問心有愧嘅話會暗啞底算!

同埋,我哋唔係傻嘅,同你又非親非故時間又唔係多(你睇下留言喺你度嘅人就知水平唔低,無乜腦殘or 無嘢撈之輩),都肯成日花時間睇你嘅嘢,就係因為識分你有幾真有幾可信!(你估寫一大堆嘢"有感而發"讀者就一定要共鳴兼支持㗎啦?都要睇下你嘅有感而發有幾合理真心㗎?素顏,你個名改得好,我真係信喎,因為你無扮過嘢囉,唔講得嘅就唔講(例如你d 感情嘢),唔係買嘅就照講,想收$但唔想收咗後無人信都講埋,我哋就係buy你呢樣嘢啫!!!!故收咗$有無公信力,真係睇人,對你來講,你收唔收我唔多關心,因為我信得過你咁大個人有人格有底線,如果你未來真係見$眼開寫d 嘔嘅公關嘢,讀者自然會走!
sorry,我寫得仲混亂過你,因為我都好火滾,d 人咁無聊去攻擊你不如寫好自己個blog先啦!!!

素顏天使™ 說...

非常感謝以上各位的長篇留言,我知打這麼多字是好花心機的 (我平時留言比人都好懶係打「十卜」就算o架啦 XDD),衷心感激。

Carrie Mak > 謝謝妳的意見。這個 double standard 的問題亦是好有趣,點解藝人收錢賣廣告你又信?Blogger 唔收錢寫野你又唔信呢?定還是 in general case 一般人都會覺得 Blogger 唔 deserve 收錢?很值得研究。

Angie > 謝謝妳的意見。對,我漏了很重要的一點。記者不能私下收受金錢利益,不過媒體本身就可以,這個也是公開的秘密,品牌佔篇幅多寡,其實好多時只是跟他落幾多錢廣告成正比,如果讀友們有做過品牌 / 媒體,一定知。(sorry 我寫得好亂) 如果這樣看,Blogger 更應收費,因為 in this case Blogger 本身已是獨立媒體,而不是一個個人;記者則只是媒體本身的一員。所以品牌把 Blogger 當作是記者編輯看待的做法是不正確的,因 Blogger 本身已是一個媒體。

素顏天使™ 說...

烈婭 > 謝謝妳的支持。

SZE > inspired by 我很喜歡的鐘楚紅接拍廣告的模式,暫時想到的可行方法是:收產品前講明是收費,如果對方 OK 照 send product 過來 (這樣可能以後都無 free product 用也不奇 XDDDD),我一樣會試用,不好的不寫,亦不收取任可 charge;如果好用我會寫文的話才收。

即是有親身試過一段時間是好的才再收廣告費用,這樣應該就不會有你提及的那種問題......o掛。

ShU > 我在微博甚至私下跟朋友都有講,依家講我豬扒話我做雞都無生意之類我跟本唔會嬲,我年中收埋收埋唔少呢的留言,日日都嬲我咪好唔得閒?唔通因為佢話我豬扒我就真係豬扒,佢話我做雞我就真係做雞咩?even 佢真係開個 post 話素顏寫野係垃圾唔好睇,我都覺得無問題,因為呢的全部只係佢個人觀感既客觀描述,我阻止唔到。

我嬲係因為比人屈我有收錢寫鱔,呢個係誹謗!只係咁。

所以你地亦唔洗因為佢地咁話我而激心,因為我覺得堅係無所謂,我覺得你地個個都好 sweet 呀!

素顏天使™ 說...

P > 好肉麻,但我真係好想比個 big hug 妳依家立即!

我好似都有響呢度講過,但我想再講,我會開始寫食評其實真係因為睇左你個 blog;到今時今日我都仍然覺得呢一世都無可能好似你寫得咁好,咁識得去形容味道,講堅。(sorry 我字庫係真係得好少字)

我好老實講,我係個普通人,遇到有 free gift 誘惑我真係唔識推;台灣 so far 都係得一個西喜可以從頭到尾都唔收 free product 寫試用,我就自問做唔到佢咁叻。

我聽過有人傳話我黐埋妳度唔知博乜 <--咁我依家幫你澄清,同果o的把口咁賤o既人講:從頭到尾都係我首先去 approach Peggy 係我留言比 Peggy 先係我約 Peggy 去食飯!因為我係真心欣賞 Peggy 文筆所以好想認識呢個人,當然識左之後 friend 唔 friend 到係緣份,可能果o的人成世都要靠痴或者本住呢個心態去識朋友,咁我唔怪得佢地既,佢地無真心朋友咁可憐。

素顏天使™ 說...

shir > 講真我連台灣的美容 blog 一向都好少睇,到依家仲 keep 住有睇只得西喜一個,所以唔係好清楚個 blog 界係發生咩事,都係有人話我知我先知有咁大壇野。

其實我覺得做全職 blogger 無問題,你維持到生計係你有本事。但有收錢扮無收,就係 another issue 了。

K 先生 > 謝謝你。

nnomore > 好少男讀者o架呢度!多謝你的意見!

"駛鬼寫成2篇文詳述想收$與唔收之掙扎兼喺weibo爆粗咩,問心有愧嘅話會暗啞底算!"

你真係寫中晒我的心聲了 T^T

Twinkle 說...

間中寫下有錢收對我地讀者黎講其實冇乜野! 你之前寫dove個d post 都好對口味 文字都可以係搵錢工具之一. 我地睇黎你blog係睇你分享睇你做左d乜 有錢收咪寫明係廣告lo! 你出名有人搵你都好正常 樓上都有講利益/公信力! 要企到正中間真係好難! 好似michellephan咁 post多兩個lancome sponsor既video到比人狂插 reputation 依樣野真係好可怕! 但係讀者有眼睇既, d人要抹黑係因為唔了解你既運作方法! 素顏你要加油 我支持你呀

Poe 說...

留名支持

Kenneth6433 說...

我也是男讀者,你大部份寫的化妝品護膚品指甲油我都不合用,但我幾乎全部睇哂,因為喜歡你的文字和態度,click到的就會很喜歡,至於frequency唔同的人,真的不用理他們,當然比人屈條氣會異常唔順,但就讓那些發放負能量的人抱著他們的負能量度君子之腹吧,加油加油~!

IamMiss無糖 說...

清者自清,我都有睇過果篇,無謂同佢一般見識。BTW, 最近有無咩平平地既面膜可以介紹下阿XD

Bren Lui / 大佬B 說...

簡單一句,想睇咪睇,睇完你仍然有個腦去分析,鬧到無野好鬧然後攻擊人地個樣同家人的懦夫,連停留響我記憶都唔配啦。

初次留言,你好你好。

艾萊尤利斯 說...

我路過o架o者,見到篇文章,所以留個言
其實只要問心無愧,其他已經不重要

素顏天使™ 說...

Twinkle > Michelle Phan 佢年紀細細就賺咁多我都好羨慕佢,你知唔知拍片擺 Youtube,最人氣果的講緊一個月有超過 10 萬收入;其實佢之前開始賣自己牌子產品時已經有好多人鬧佢架啦,都唔知鬧o黎做咩,人地 demo 個化妝你睇唔洗時間,又唔係請槍揾人化;再者,Lancome 部分 product 亦真係幾好用丫。

Poe > 多謝支持。

Kenneth6433 > 大大力多謝你連我寫化妝護膚的汁都撈埋!

IamMiss無糖 > 我日常係用我的美麗日記,但係佢新出的 mask 麻麻地 (我真係有買架),除左拉提果隻之外。

Bren Lui / 大佬B > 久仰久仰,多謝支持。所以我唔會再睇果個 forum 某 D 人寫咩,佢有道理,佢跟本唔需要人身攻擊。

艾萊尤利斯 > 多謝支持。

momo 說...

看了幾個forum的回復, 體會最深的是明明白白地知道了"什麼是腦殘"...睇到我都覺得好忟!

我呢, 不是素顏"粉絲"啊, 別又說"用粉絲打壓什麼什麼的",我只是公義的支持者!

支持你啊素顏天使!

素顏天使™ 說...

momo > 多謝,hug~*

Sharon 說...

你好! 我睇呢個BLOG 已經睇左好耐, 一路都覺得你係真心去寫REVIEW, 好多時唔好用嘅產品都會好坦白咁講, 唔似好多BLOGGER樣樣野都話好好用, 好推介大家去買, 你真係好有心!

其實真心寫文大家都睇得出, 但總有D人做D 野出黎想令人誤會其他人, 但其實好多人支持你!!

同咪除左美容化妝嘅文章, 你自己作嘅故事亦好吸引我!請唔好放棄呢個BLOG!!