我的五個夢想

多謝 apple13 tag 中我。

「做人無夢想同條鹹魚有咩分別?」─《少林足球》

呢個題目真係考起,講真,我都真係好鹹魚,做人做o左貢多年,有乜o野夢想都一早磨走晒啦~ 唔~ 等我攝高枕頭諗諗先~

‧夢想一‧
食極唔肥,唔洗節食做運動食藥減肥都永遠 keep 住110磅超 perfect 身形(我五呎七o架喂~ 少過110都過份得滯啦大佬呀~)。又或者,全個世界突然間興我呢隻款啦~



‧夢想二‧
永遠中產(《號外》情意結?)。我心目中o既 model couple 係練海棠同伍詠薇。兩個都又靚又有 taste 又恩愛,最緊要係有o野做有工返得o黎又可以好賺錢買花戴。你要我幾百億身家住凱旋門頂層我諗唔係好o岩我,中產啦~ 中產就o岩o岩好啦~ 希望我同我男朋友第時都可以係咁樣啦~ :em_34

‧夢想三‧
可以每年最少去一個我未去過o既地方旅行,而且唔係節衣縮食訓 B&B 團,要係豪華暴飲暴食暴買團。(話明夢想呀~你咪理我啦~)

‧夢想四‧
隻貓仔生性。唔洗我幫佢倒貓砂自己去大小二便又識得沖廁,唔會搗亂唔會夜媽媽無啦啦亂咁 meow meow 叫。我要做o野果時識得走開自己玩,最好識得清潔埋佢自己個竇啦。

‧夢想五‧
靠賣自己o既 creativity (包括 design 呀,illustration呀等等等)發達,um...我諗都無咩可能。

諗唔到 tag 邊個,見到想玩留 mesg 比我就得啦~

Designed by OddThemes | Distributed by Gooyaabi Templates