新正頭都要鬧 X 爆你！
是夜一行好友七位 (本來八位，B 小姐生病甩底)，團拜 gathering 兼且慶祝其中 E 先生同 F 小姐o既生日。
昨傍晚致電此 Times Square 分店 book 位，問清楚係 book o左一定唔洗等先 book 位o既。我食過中環萬宜大廈分店好幾次，環境又靜又舒服o的人又斯文o的o野又好食仲要唔貴，此時代新店某次路過覺得幾靚，而且約響老銅好似比較方便，所 以今次食飯就揀呢間。
點知就賴晒o野！
o野唔好食，都算，果o的咁o既 service 我真係嬲到青筋都爆埋出o黎！
八點鐘，我同 F小姐先準時到達，接待處已經逼滿人，向接待處位小姐羅位， (幾靚，貌似好多年前落選港姐吳妙儀，化o左個靚妝 set 行晒頭，略帶鄉音) 呢位小姐只係響張紙上面我個名度剔o左個剔，就無再表示我地幾時有檯，見佢極度忙碌，而且我o既朋友們都未到，就同 F小姐耐心等候。
八點二十分，見其他 walk-in 客都有得入座，而且我另外兩名朋友都到o左，再次問呢位小姐我地幾時有位，佢只係表示 10分鐘後先有檯。 (book o左都要等半粒鐘，咁我 book o黎做乜？) 於是我安心咁同我o的朋友傾計講笑同埋行開的讓比其他人企埋去個 counter。
八點二十五分，有人用極差劣態度極大聲大喝
「黃小姐，八位呀！」 即時全層30幾人靜晒望住我o地行過去。
我拎住果張帶位飛仔，好嬲，直刻對住呢個女人話：丫！你都好無禮貌o架喎！
呢個咁o既人即時藐嘴藐舌咁話：我叫o左你好多聲o架啦喎！咁唔好意思o羅！
o羅？？？fine，我唔投訴爆你我唔姓黃呀以後！
不過醫肚要緊，何況依家投訴佢用乜易響我食果o的o野度加料 lur 啖痰落去我仲得了？
落單o既女侍比較好禮貌，點o左呢o的－
小點前菜 － 海蜇，無味的。
小點前菜 － 醉雞，呢味唔錯，雞滑而且入味。
小點前菜 － 皮蛋豆腐，食完先發現唔幾得影相，全晚最好食呢樣。
呢樣我最鐘意，心太軟，紅棗去核放小糯米糰蒸熟，淋上桂花蜜，暖暖地食最好。
勝瓜炒雜菌，廣東小菜，好難整得唔好食，咁都 OK 好味既，新鮮。
女侍推介，香煎 (炸?) 小黃花，呢味就個個都讚，肉嫩皮又煎到脆卜卜，好靚。
小籠包，明明見到我地七個人，五隻小籠包邊度夠分？一般，唔難食又唔算好食。
棒棒雞，好多菜，粉皮得少少，好奇怪，似辣o既炸醬撈麵果的炸醬，一o的都唔正宗。
紅燒元蹄，差勁，塊皮同o的肉一o的都唔化，肥淋淋，同行 E 小姐夫婦食到媽媽聲，猛話中環店好好多。
砂鍋雲吞雞，未上桌已經分好每人一碗，雲吞十分麻麻，最差係個湯，跟本就係味精豉油水！！最奇怪係唔知點解唔幫我地分雞，又唔比刀叉又唔比公筷，就咁就掉隻雞響檯面。
呢味又係失望，o的叉子燒餅同中環店完全無得比！！粉漿一團咁痴晒口！o的餡又炒到勁乾！極差！！
桂花拉糕，都未食過o的咁Q難食o既桂花糕，年糕求其淋的桂花糖響面就話叫桂花糕！好彩淨係叫o左一碟！
酒釀丸子，好睇唔好食！完全無酒釀味！！而且極古怪有o的羅拔臣o者喱味o羅！
環境極差！又嘈的檯又逼又細！十足十街坊酒樓咁！
同一個王姓部長定唔知咩經理投訴果個 receptionist 同埋o的o野難食，佢滿臉懷疑態度輕佻！對於o的o野唔好食佢堅稱呢間舖o的師傅都係中環店果o的人！你滾我呀o依家！！一食就知唔係路啦！
埋單 $1102。
此店本人 black list，永不錄用！
－－－－－－－－－－－－－－－－－－－－－－－
小南國狀元樓
地址：銅鑼灣時代廣場食通天12/F 1201
電話：2874 8899
菜式：上海及廣東
發佈留言