呼吸

呢兩日頻頻撲撲，忙細佬結婚o的o野忙到嘔泡。連 update 下個 hompy 時間都無。

夜晚同男友到旺角處理俗務，7pm 左右開始非常肚餓 (下晝只吃了半碗魚蛋米同幾條菜就趕住去修甲)，週六晚整個旺角都人山人海，好乞人憎。男友知我怕肥，suggest 到 cafe 吃飯去，咁旺角幫襯 cafe，綜合歷年經驗，要食o野的話就一定只會去 Full Cup。

先聲明，你要上去食飯，先得有心理準備o的檯木凳 係異常地逼 (比茶餐廳闊少少)，繁忙時間又多中學生又嘈喧巴閉，最緊要o既係，你要有大量得閒到爆o既時間。

o黎 Full Cup，主要，係食佢有 heart！

(一盞靚燈！睇落似真 vintage！)

先 講下環境，幫襯o左佢幾年，會不停咁轉裝修佢都算係 cafe 中o既少數，而且係明顯地有o的 taste 果隻，電影《公主復仇記》其中一幕亦取景於此，據悉老闆係廣告人，咁有心機，正常。另外有露天位，呢個亦係其他 cafe 無得同佢鬥o既地方，旺角坐露天搖搖椅飲o野啊！去邊度搵？！

我o地 7pm o黎到，因為未有 set dinner 住，就先要o的 snacks，同叫兩杯o野飲住先~ 男友飲 iced mocha，我果杯係凍士多啤梨玫瑰紅茶，好味~ 呢度o的o野飲係 keep 住都有高水準 (比起同區 cafe o黎計)！

呢個波波腸，等o左足足 40 mins 先有得食！！好食係好食，腸仔咁細「藝」o野都又落 seasoning 又搵生菜絲墊晒底咁！但係差o的餓死我o羅！

等到 8.10pm 先有得食o既 set dinner ($49)，已經餓到癲o左~

呢 度o既 set dinner 十分趣緻，用個盤裝住似足飛機餐，男友就話比較似兒童餐。set dinner 有麵包＋湯＋意粉＋生果＋甜品。意粉就日日都唔同，純粹靠撞手神。今日呢個整到粒星咁o既呢係雜菜豬柳紅米飯，咪睇個樣咁搞笑，味道都唔錯o架！豬柳係豬 頸肉．蔬菜全部都係新鮮o野喎！羅宋湯同個蒜蓉多士亦都好吃，蒜蓉真係一粒粒果o的手剁o野喎！甜品芒果布甸落足芒果粒，住家 feel。

埋單約$170。絕對唔算平，但係物有所值。

－－－－－－－－－－－－－－－－－－－－－－－－－－

呼吸咖啡茶館 Full Cup Cafe
地址：旺角登打士街36號恆威商業中心4，5，6樓
(好生意到包起三層，我去o既係4/F)
電話：2771 7775
菜式：西式
備註：不設現金找數，只能使用儲值卡，每次增值最少$200。