細佬擺酒 (下集)

細佬擺酒,只招待小量親朋戚友,女家連親屬淨係得唔夠 10 個人,所以係我o地男家主打,預算八圍。

點知有差唔多一圍o既人 (我細佬香港o的朋友&同事) 甩底又唔出聲!

搞到亂晒籠!然後搞到我阿媽開頭又黑鬼晒面,我細佬無咩叻,但係佢 EQ 高,反安慰我阿媽,話:「其實初頭我都無諗住擺酒,依家有 6-7 圍人o黎都唔錯啦~」

咁我阿媽面口先好返o的咋~ um~ 我細佬係有o的計o既~

是晚我同男友只係負責坐迎賓位,無咩好搞,主要係叫人簽下名,同埋幫阿媽 keep 住o的人情咁囉~ 話時話呢晚擺酒都唔係平o架,雖然係大陸咋,但係都要 around $3600 一圍, 因為條魚同隻龍蝦貴喎,同埋間酒店都有當地 4 星o黎o架!

玩下o的無聊遊戲,開香檳,切蛋糕就開席,時為 6.30pm,同香港好唔同,就係呢度興早開席,香港無 9pm 都唔食得啦,同埋呢度興一o野就上晒o的菜,勁快食完─


菜單 (普通圍)

我坐男家主家席,據聞同其他幾圍係有分別o既,o的料好似會比靚o的,不過我都係覺得麻麻地,算啦,去飲都唔係為o左食o架啦~


先來乳豬全體,都唔係幾掂,肥到死!


芝士焗龍蝦,唔知點解會係配烏冬底,au 晒頭,不過呢味都幾好食,龍蝦係波士頓空運,新鮮,唔錯唔錯~


發財好市大利,新年果期已經食到驚,點解仲會出現o架?!


陳皮蒸鮮鮑魚仔,麻麻地。


翅,好唔掂,翅毛都食唔到一條。


燒乳鴿,好味,食o左三件,嘻嘻嘻~


帶子螺片西蘭花,都 OK o既,清清地。


清蒸大海斑,本來可能幾好食,但係佢上魚果時我去o左敬酒,返到o黎食就已經凍冰冰 lu~


蠔王鮑魚菇伴時蔬,OK 咁啦~


福建炒飯,好濕,唔掂。


美點雙輝,粒糯米滋個餡係甜o既椰絲,好難食~


最後有紅豆沙同生果盤,食完!時為 8.15pm!

全晚最難得一見係我老竇阿媽講o野 (仲影o左張合照!),我已經幾百年無見過佢o地講o野啦!你要明白唔係人人都做到狄波拉同謝老四,離o左婚 / 分o左手,唔一定會做到朋友o架嘛~

搞呢搞路 9.30pm 閃,返到屋企已經 12am,支力到爆!

同場加插─

我有個細表妹 (20歲) 生o左個女,上年 2 月見佢仲係 BB,今年已經識行啦,眼大大,面仔肥o都o都,又鐘意笑,跌下跌下咁超得意,個個親戚都錫到佢火農!!!:em_35




「我係璇璇呀~ bye bye!」

:em_48



Designed by OddThemes | Distributed by Gooyaabi Templates