入正題。
好友 E 小姐約飯局，要求食唔油膩o既o野。
得！無問題，咁食日本o野啦~ 嘻嘻~
之 前好幾次想o黎試，都爆到不得了。8pm 打去訂位，都要9pm先有檯，結果去到，都仲要等o左一陣。門口位靚女日藉 receptionist 就問我地 bar 檯或者 outdoor 坐唔坐，雖然是晚得 15度，照殺啦~ 加上有聞出面露天位係比較靚，求之不得。
果然係幾靚呀o下~ 小橋流水咁樣！但係記得著對靚襪，因為要除鞋o既。
2個人 order o左呢o的，E 小姐是晚胃口極好，可以試多o的─
先來一個「店自慢」厚燒玉子(約$50)，怕佢寡，要o左個蟹肉餡o既。的確係幾好味，蛋好甜好 juicy。
海鮮茶壺湯(約$60)，鮮甜而且料極多，緊記飲晒o的湯先食湯渣，唔係好快凍晒！有好多蝦膏大蝦兩隻，大蜆，帶子，魷魚等等。
牛肉石頭鍋飯 (約$70)。韓式。凍冰冰食熱辣辣o既飯一定好食o架喎~ 相係撈到個飯亂晒籠先影o既。食到最尾有飯焦，個石頭鍋喪熱！
最失色o既一味，帶子串燒($20) 同賣 芝士雞肉串($20)。攤得太耐，食果時都凍晒lu~
追加一個韓式旬菜燒餅(約$50)，唔知點解係韓式亦唔知乜o野係旬菜，味道一般，不過熱辣辣好開心喲~
最後一人一個甜品做總結。我食南瓜湯丸($20)， E 食杏仁茶湯丸($20)，日式湯丸細細粒，暖暖地，又唔會勁甜， 都OK，不過唔夠「破」(註一)，menu 寫係手造o架喎~
服務又係一讚，個阿叔 waiter 非常好禮，同埋問o左我o地好多次要唔要坐返入去，驚我o地凍喎~
埋單唔知幾錢，E搶住請客，單我都望唔到，我就超唔好意思，真係多謝晒。
喂！下一餐記得比我埋呀！
註一：破，呢排口頭禪，創新o既意思。
──────────────────────────
一門
地址：銅鑼灣軒尼詩道502號黃金廣場4字樓
電話：2504 3313
菜式：日本菜
發佈留言