打邊爐~爐~爐~爐~爐~
銅鑼灣打邊爐，首推有骨氣，而銅鑼灣兩間有骨氣分店入面，又以禮頓道分店為首選！地方闊落，樓高四層，坐得舒服，服務又唔錯，又唔會要你搭檯，抽風系統又好，食完個身絕對無油煙味，價錢方面就中價啦，當然同街邊大牌檔式係有o的分別。
七點o黎到，唔洗等位即有位坐，好彩早o黎到咋！30mins後都已經 full 晒！
湯底揀o左豬骨煲，其實淨食呢煲o野都飽到痺，有豬骨啦，蘿蔔，粟米咁樣。
HSBC 信用卡呢期呢度有個 promotional set ($160 或 $140)都幾抵食，可以試勻呢度好幾款招牌邊爐食品，size 比散叫細一半，無咁滯。我o地就要o左 $160 果個 set，有呢o的o野食 ─
最緊要o既美國肥牛 (大)，普普通通啦，同方榮記就梗係無得比！
(左起：椰菜雞卷、水晶叉燒包、水晶奶黃包 、蟹粉小籠包)
呢幾樣o野都係呢度出名o既邊爐特式食品，水晶叉燒包 同 水晶奶黃包 得意有水準，好味！蟹粉小籠包 就麻麻地，個皮好易比筷子督穿，漏晒o的湯汁就慘啦~ 椰菜雞卷 亦都係麻麻地，可能我洽佢洽得太耐，個椰菜淋晒~
我好鐘意玩o既 手o即魚麵，煙韌有緻，唔錯唔錯。
因為個 set 無蔬菜，再散叫o左呢個 溫室皇帝菜，其實我都唔知咩係皇帝菜，以前無食過，貪得意叫的。皇帝菜食味似係芫茜 mix 莧菜，可能係佢地生出o黎o既仔啊~~~ (搞爛 gag)
另外再加埋呢個 四寶丸，手打的，先加 10 分！分別係墨魚丸，香菰貢丸，粉紅色果個似係豬肉丸，同埋鯪魚球，四個都好味！
因為食食下我辣親個上顎，要o左罐 coke light 同男朋友 share，留意呢度 coke light 只有檸檬味。
由《細說名城》睇到果套爛鬼驃局，食足兩個半鐘，全檯清晒！
埋單 $390，唔算平，不過無法啦，兩條友打邊爐係無咁抵的了。
──────────────────────────
有骨氣海鮮酒家
地址：跑馬地摩利臣山道 84 至 86 號 (近禮頓道)
電話：2312 1212
備註：此分店設有 火鍋區 及 小菜區
發佈留言