土曜日至火曜日之食事

噢 梳-lee everybody~ 因為我實在忙得可怕,都好幾日無寫過食評,今朝比較無咁忙 (其實都係好忙),唔,可以寫下啦~

星期六晚,同男友訂完床求其搵o的o野食,貪快,去o左太興食燒味飯。




溫 of 賣飛佛,冰鎮凍奶茶。



我要的叉油雞飯,瘦叉得來都唔算韌。都唔錯,太興o的燒味都 O 的。



隨餐附送的油菜。

(我影果時手震)

男友的八寶飯,有夠誇張!(正常係四寶,呢個係 double!) 廚房走單,等o左足足 20 mins,好脾四如我男友都忍唔住發脾四催個阿姐,阿姐當住我地面鬧個斬燒味佬,當時我係心諗:「個燒味佬會唔會報復加料落去碟飯度o架...:em_36

鬧還鬧,唔好當住我面嘛大佬呀,影響食慾o架。

埋單齊頭 $100。

‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧

星期日,灣仔睇燈飾傢俬,睇之前搵o野食,男友想去蝦麵店,不過原來佢逢星期日 off,退而求其次,隔離間唯一囉去o左。

呢間唯一其實即是老尖厚福街果間o既分店。不過呢度闊落o的o的,裝修又好o的o的。



熱辣辣脆卜卜爆汁 juicy 北京餡餅,$6,平靚正。



鎮江小排骨,personal o黎講唔太 buy 鎮江 style 排骨,我覺得o的肉比o的醋醃到好硬,不過男友想食,所以 order o羅。其實呢度都做得唔差,只係我唔特別鐘意食o者。



油亮亮的上海粗炒,基本上係個齋麵,都夠鑊氣,同埋好鬼大碟。

連兩杯凍豆漿,埋單約 $80。

‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧

星期日晚,食自己,行完 G.O.D. 響對面馬路食何洪記。



油菜芥蘭,$17,舖租佔o左 $15。一般,官涌麥文記好食得多。



細蓉 (雲吞麵),擺法正宗,雲吞墊底,賣 $24 碗o既佢比起麥奀記都唔算細碗,食味亦比麥奀記好,不過都只係唔難食又唔好食o羅。

最好食係檯面樽唔洗錢o既醃酸蘿白,我隊o左好多,埋單 $41。

食家蔡瀾先生曾經寫何洪記係本港最好食三間雲吞麵家之一,我其實就唔係好覺,僅普普通通而已。

我覺得最好食係黃枝記。

‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧‧

星期二晚,Ladies Night,跟好友 apple 同埋 P 食飯,女人飯局,清清淡淡啦,apple 介紹到銅鑼灣一家新上樓素食 cafe,賣點係 organic food。



環境舒服,白色綠色為主,不過略嫌o的檯木凳對我o黎講比較矮,我全程要烏低身食飯。廚師 (應該係老闆)係兩個後生麻甩仔,因為成晚都無乜客 (唔計我o地,得兩個),變相包場。


(sorry,out-fo o左)

先來一碗蕃茄南瓜湯,都唔錯,唔會話寡得好緊要,始終南瓜比較 rich,都無話好削。



然後要o左呢個唔記得咩 herbs 醬撈扁麵,略嫌凍得滯,同埋有好多我最憎o既沙律菜,一般。menu 有個茄子撈麵,隔離有個鬼佬order,好似好食得多。



甜品要o左呢個自家製雪糕香蕉船 ($35),講到明無落奶,係 made by order 即席用雪糕機打出來的,所以都等o左頗耐,雪糕係用好多生果例如香蕉芒果紅腰豆呢o的溝出o黎,食落有o的o趙頭,叫幾得意咁啦。

各自比自己果份,我最貴,$115,其實 average 大慨 $80 左右就 OK。

可以再做好一o的,希望佢捱得住啦,都睇得出佢有心做o既。

────────────────────────

太興燒味連瑣店
地址:銅鑼灣利園山道55號地下
電話:2576 8961
菜式:港式

唯一麵家
地址:灣仔蘭杜街2號麗都大廈地下10號舖
電話:2886 9303
菜式:京滬

何洪記
地址:銅鑼灣霎東街2號
電話:2577 6558
菜式:廣東

Harmony Cafe
地址:銅鑼灣登龍街21號2樓
電話:3109 3152
菜式:西式素食

Designed by OddThemes | Distributed by Gooyaabi Templates