弟弟和爸爸

我的弟弟跟他太太剛租下了一個我的親戚的房子,在深圳,超廉宜。那位親戚在海關工作,住的 單位是個海關宿舍,治安良好 (較深圳其他地區) (要打劫都不敢啦~),700多呎的房子,有個大露台,才租 RMB800 人仔一個月!!!!就算不是親戚價,亦只是 RMB 1500 人仔.......點解仲要住香港捱貴樓呢,o下?!

我爸:700幾呎都夠啦,兩個人。
細佬:係呀,唔係(的話就)抹死人。
我爸:咁又係呀,o拿,阿嫂 (指我弟婦) 呢就得啦,一塵不染,(又望一望我 + 冷笑) 你就一定唔得啦你。
我:..................

咁點先,我要返工o架大佬!阿弟婦又唔洗做,我住緊 400 呎都已經執屋執到好想死。

**********

然後,我爸跟弟弟又討論起做生意,但其實這兩個人,是(暫時)無本做任何事的。是不是男人到了一個年紀,就一定喜歡吹水o架呢?

我爸:我想o係 OO 度開間舖頭仔賣衫 (OO = 爸爸女友住的地方)。
弟弟:(一臉鄙夷) 唔洗諗呀,死梗。
我爸:唔係喎,一條休閒褲來價 RMB40,我睇住佢賣 RMB150 喎,好賺呀!
弟弟:(好醒的語氣) 超!你諗果o的我一早諗o左啦!阿細表哥個老婆咪就係咁囉,響 OOO 度開o左間,咪一個老婆一個老公果o的咁囉,間間都係咁啦,有鬼生意呀,個個都蝕o左幾皮o野執粒先開心。
我:..................
我爸:咁呀........咁.......不如做金銀衣紙 (!) 啦喂!掂呀一定!
我:..................
弟弟:o拿計我話,開間補習社啦,天王天后果o的呀,賺梗。無本開咋我,有我一早開o左啦!

**********

弟弟知我明年結婚,問我想要甚麼禮物,上年他結婚時要了一部相機,那我亦不想他花太多錢,就說也要一部相機。(事實是我想要部 GR Digital 好久的了。)



弟弟:又係相機?你無咩?
我:無喎真係。
弟弟:你買部四千幾五千蚊部電話但係無相機?(其實不是我呀,是我男友)
我:咁真係無丫嘛,一係你買部 Wii 比我啦。
弟弟:咩 Wii 呀?
我:Wii 喎。
弟弟:都唔知你講乜。
我:白色果部喎。
弟弟:哦,任天堂呀,你要o黎做咩o者?
我:...............你理得我丫!

3 則留言:

塞米一條揚陸轟炸機 說...

哈哈....你細佬似做大佬多d喎XDDD

我覺得投票欄應該加上"寫我家人"一欄,一定超多人揀!

Crystal 說...

你都係26,咁你細佬咪好細個結婚囉!好少男仔會咁早結婚架喇!

不過你細佬又真係幾....成熟...

匿名 說...

你細佬講野好"佬"....wii嗰段至攪笑.....任天堂...掂丫...不如提意佢開間舖賣game啦