劣食死死團 之 明將迴轉壽司

我向大家隆重宣佈,新環節,劣食死死團首次登場!

為了破解某些傳說中好難食的食店是否差得那麼可怕之謎,給他們一個平反的機會!(道理上,跟有一千人話你知《殺人犯》好難睇,你都堅持買票入場「睇佢係咪真係咁差」一樣。)

我,和幾位「劣食死死團」探險隊隊員 (其實都是平時那幾位飯腳如袁健健先生,PY 小姐,C 小姐一干人等),決定深入虎穴!正所謂「我不入地獄 誰入地獄」,首炮為傳說中地獄級數般難食的明~~將~~壽~~司司司司司司~~~~~~

明將壽司有多難食,早早就超越了一般港式日本料理犯的不夠正宗、不專業的毛病,而是難食到難以下咽的程度。成為一眾高登巴打的笑料,並為之開了個好經典的帖,惡搞蔡瀾的一個飲食節目,按此好文重溫,對明將壽司聞所未聞的也請先讀此文,真是笑到嘴都裂!

而不解之謎是,傳說中那麼難食的明將,它的分店卻是遍佈全港 (灣仔 / 旺角 / 大埔 / 沙田 / 深水埗 2 間 / 粉嶺 / 屯門 2 間,共九間),且每一間門外都站了人龍等位,往往得花上三十分鐘或以上排隊。當然明將對於收入不多的階層,特別是零用錢不多的學生哥,這裡對他們來說就是個不俗的選擇;因這裡是行任取任食制度,而且不限時間,是故人流仍然不絕。還不計加一,每位亦只是 HKD$50 不到的價錢!

這篇食評,我和一眾探險隊員冒死拼命作戰,照片數量之多亦破了我寫歷來單篇食評之冠!可能下載的時間會比較長,請各位多多包涵。

這是 PY 用其 EP-1 拍的照片,塗橙色指甲油正在拍照的就是我。

環境方面,是次我們光顧的西九龍中心分店,燈光昏暗 (見上圖),不過場內可容納人數極多,放眼所見,客人都是以十幾歲的青少年為主。我們分派到的那張桌子,極髒,完全無抹過 (亦無人表示要抹),很多醬油漬。杯子和筷子也有眼見的污漬,沖茶用的那壺「熱水」只是微溫狀態。PY 入場時就不小心踩到地上的飯糰,是遍地都有飯糰飯粒,完全無人清理,衛生狀況讓人擔憂。不過話雖如此,我們幾位吃過之後都完全無感到不適,或是肚痛肚屙之類的反應。


「揾命搏」之選,不知名魚生壽司,魚生片乾到懷疑經過脫水處理!

雜果壽司,連我都不敢放入口!食過的團員的食後感是「放左好耐!」,雜果加沙律醬都可以做壽司,只此一家。另外雜果系列還有 pancake,pancake 皮厚過綿被,人家賣的 pancake 多是混了忌廉,這裡的,仍然是混沙律醬!!!

這裡的炸物系列真的「很出色」,這個炸魷魚鬚壽司 (那麼 ridiculous 的材料!)就是其中的表表者!所有經過油炸的食材都是冰冷且帶油膉味,我們都不是很明白,其實炸物如果是剛炸起就奉客,其實都不會太難食,但這裡所有的炸物都是呈冰冷的狀態,可能已經擺放了好久?!


金玉其外系列,炸帶子壽司!不要被其華麗的外表所欺騙!


一開二的慳儉設計才是精粹所在!那層炸衣口感堅韌,少點牙力都難以嘴嚼。


金玉其外系列的八爪魚丸,賣相都好正常。

其實是空心的!而且是完全沒有八爪魚的縱影,它的主要材料其實是厚厚的無味麵漿和薯仔!好有創意!

蟹棒壽司,質感似擦膠 (橡皮擦)!!!非常肯定不是肉類,莫非是新派素食?味道似我們小孩時代會買,那種其實是麵粉和化學味精所做,白色一條條的鱈魚絲小吃。

這裡最「著名」的甜蝦壽司,真的好細粒!據吃過的幸運兒表示,甜蝦是臭的!已經不是霉肉那麼簡單。

有團友表示,其拿來釣魚的魚餌豐年蝦,比這個蝦還要大隻。見附圖,真的比女孩子的手指尾還要小啊!

炸不知名魚件,女侍好 casual 的就掉在我們吃過的其中一個碟之上。其實只吃到炸漿和魚骨,炸漿的評語跟上面的炸物類同。我們幾個都以為這是炸三文魚。但據唯一吃到魚肉的那位幸運小姐供稱,這個魚肉是比較似咱們的鯇魚,中日 fusion。

豬肉鬆壽司,豬肉鬆呈硬身!!!可能是先經過熱飯的熱力「煮過」,濕過後成糰狀,再久放之下成了硬身豬肉鬆。事有湊巧,今期《壹周刊》美食家黃又又如示範的「鵝肉鬆糯米小飯糰」,跟這個壽司的概念基本上是相同的。天堂與地獄,有時真是一線之差。


See!連賣相都有如兩生花!(圖片轉至《壹周刊》)

至於本日難食之冠,首推這個紅豆壽司!想到做這個壽司的人應該是無味蕾的!我一邊吃一邊流眼淚 (真的哭了!),首先是因為喪笑到哭!加上這壽司真是好難食,但當下已經全件「啪」入口,進退兩難。紅豆是呈起沙的粗糙狀態,但是甜的; 然後再加入鹹味的沙律醬!還有那一大「o舊」硬的無味白飯,我真的有比死更難受的感覺。

劣食團員公正不柯,以下則是經一眾團員共同商議,定出來的「勉強可以入口,味道叫做正常」系列。

鰻魚壽司、海蜇壽司還有八爪魚仔壽司,因都是經過重調味,都可食用。海蜇壽司 fusion 化,因它真是平時燒味拼盤那些中式海蜇,還加入了素魚翅,層次豐富;蟹籽壽司則跟元綠一樣賣的都是海藻做的假蟹籽,我們當自己吃素,勉強還能入口。(老老實實,在這裡吃素該比吃刺身安全得多吧!)

螺肉壽司,也是經重調味,可食用。


Fusion 代表之一,煙鴨胸粒壽司。


賣相似嘔吐物,其實是吞拿魚壽司,沙律醬多到出水。

明將的師傅刀功細膩,我還是首次見識絲般薄的三文魚刺身壽司!我們一夥人還真大膽,一人一件(!),結論是有點「失望」,因為這個「燈影三文魚」味道和顏色都是正常的。不過這裡提供少許冷知識,三文魚刺身其實十分耐放,就算放上多日,味道和顏色都不會有太大的改變。

全晚唯一新鮮做的壽司,就是這個有點像塑膠做的蛋壽司,賣相幾可愛。據吃過的團友表示那塊蛋是完全無蛋味和蛋的質感,該是混了太多水。至於為什麼稱其是新鮮製造,因為飯糰是暖的,而其中一位團友表示「飯有酸味」,我們都祝福他是吃到醋飯,不是放到變酸變壞的飯糰......


Wasabi 放到出水,如果我不說,還以為是要給客人試吃的綠茶雪糕試吃品。

而我們所吃的壽司,飯糰本身全部均是機壓品 (被我們譏為「箱壓壽司」),鬆散,已是小事;九十九巴仙的飯都是無醋味,且呈因室溫下放太久至開始變硬的狀態 (除了上文提及的蛋壽司);所有的紫菜都是軟的淋的,最惡頂的是,因為這裡好像是有個「吃不完白飯要罰錢」的機制 (未經証實,在 Openrice 見到),故此死死團員都逼住要把整糰白飯狂吞。吃至最尾真的頂不住,某團員竟把白飯拆散,黏在碟底以瞞天過海!

我們幾位團友都是極有衣食和食量大之人,可惜這裡連白飯都做得極度差勁,被逼要浪費食物,善哉善哉。

在 Openrice 見到有投訴他們的服務問題,就本日所見,侍應們尚算有禮貌,甚至為我們推介不同的壽司。不過人手明顯不足,稍有服務不周,也是可以原諒。

不設加一,買單 HKD$288!六個人,HKD$300 不到!

但如果你問我會不會再來?答案是死都不會。我情可用 HKD$50 買營多撈麵在家狂吃沒那麼生氣,好食一萬倍!可能有人會話你給這個價錢又可以任食,還想怎樣呀之類,不過 HKD$50 可以吃到的好東西實在太多,就光是深水埗已有太多好選擇,譬如維記的豬潤牛麵、劉森記的蝦子撈麵、合益泰的腸粉、坤記的糕點、傷心酸辣粉的酸辣粉......等等等等。其實說是任食你又吃得了幾多?胃口有限,絕對無必要來這裡吃飯虐待自己肚皮呀!



申延連結 ── Puiyee《劣食死死團:團員感受分享

-----------------------------------

明將迴轉壽司餐廳 Ming General Japanese Sushi Restaurant
地址:深水埗西九龍中心6樓612-613號舖
電話:2360 2398
菜式:日本(?)

29 則留言:

KennyT 說...

囧rz!!!

哈哈哈哈

KennyT 說...

驟眼睇我以為煙鴨胸粒壽司係臘肉壽司

魚生+雜果+紅豆個3牒你地都夠膽食, 贏左!

車厘教主 說...

講堅...我一路食果時係勁驚囉....我好驚會死呀!!!好彩食完返黎無事jei~期待劣食第二炮!!!!

戀曲1990 說...

我吾係歧視深水埗...係未for d 低收入家庭dum細路架?6個人放題吾洗300蚊?...睇見咁款,覺得妳地好勇敢,呢期咁多食物中毒...請受在下一拜!

素顏天使™ 說...

KennyT > 臘肉壽司 <--好有創意!!!! XDDD

戀曲1990 > 全港收入最高中位數的灣仔區都有分店, 選深水步分店, 1) 因為在 openrice 那麼多分店之中食評它有最多劣評, 2) 因為當晚我們要去光顧另一家附近的食店.

Miss Wong 加德膩奧娜 說...

係咪痴線架呢間野?!

甜蝦壽司上面個舊係咪蝦米黎架?咁都攞得出黎見人geh?!仲有條蝦腸好核突!

去呢d地方食(生冷)野同搵命摶根本冇分別 =u="

btw成篇野都寫得好好笑。

KLY 說...

天呀,所有高登團之中我覺得最恐佈既就係劣食團....
估唔到素顏你都搞埋一份.....[banghead]

咁下一站係沙角屠夫萬人斬邊爐,旺角死亡韓燒任食自助餐定係廟街劣食炭屎煲仔飯?[sosad]

eu 說...

好核凸,真係唔敢食,仲要$50位,我寧願比返$50"明將"!

BusyBee 說...

我同樓上意見相同...
做乜好玩唔玩玩埋劣食團呀...orz
我睇到好想嘔... <- 我想像力好豐富, 不過相信我真食的話已經嘔左九世!

Dull 說...

個紅豆壽司望落真係好.恐.怖…唔知點解我覺得好似腦漿 orz

但更加恐怖既係有人同我講過話呢間野幾好食跟住叫我去試........-__________-"

詩白爾 說...

向烈士敬體!食果陣有冇終於講到D你平時講唔到o既粗口?

仲有你地下次計劃去邊度以身犯險?係咪去「壯陽苑」?

詩白爾 說...

向烈士敬體!食果陣有冇終於講到D你平時講唔到o既粗口?

仲有你地下次計劃去邊度以身犯險?係咪去「壯陽苑」?

K先生 說...

要向咁多位團員敢死隊精神致敬!

另, 真的邊睇邊笑到流眼水,

期待你們下一次冒險

Nana 說...

一路睇..忍唔住笑左出黎= ="
好佩服你地咁有勇氣食囉...淨係睇第2張相雜果壽司已經覺得好恐怖...

匿名 說...

我去過灣仔分店喎, 排咗半個鐘
入到去... 發現好唔掂
壽司帶轉咗幾圈都冇乜魚 (連三文魚呢D最平既都冇)
淨係得D粟米,蛋...
但飯明顯比D餸多
仲寫明食淨飯要罰錢!
叫佢攞D三文魚,等咗幾個字都冇
結果頂唔順, 要奪門逃跑呀 (一碟都冇攞過)!

三隻耳朵 說...

以我的認知「元祿」是最差的壽司店,不過從未幫襯過所以不得作準.
常去又便宜的是「元氣」又幾好食.
至於妳這間「明將」呵呵...聽都未聽過,$50真是很選擇而且好好味例如:9記牛腩.麥文記.澳洲牛奶(應該可吃2份常餐)...便宜都要入得口架~

呢篇好好笑...期望下個任務!
妳們一眾敢死隊員也要保重.

Person of Not Significant 說...

支持劣食團大無畏既精神,但都要保重身體,呢d劣質食物,真係可以食死人......

yiuyiu 說...

期待劣食第二炮!!

匿名 說...

其實呢.明將既話. 唔同地方唔同質素. 相傳西九呢d咁平既. 見到$50任食仲去既真係唔怕食死咩. 不過有d分店唔係件食架. 雖然都係好平. 雖然都係cheap野. 但我唔覺得係咁唔掂囉. 粉嶺分店都係口平差. 但我個人絕對認為沙田分店唔錯! 呢排仲岩岩搬左上商場! 而炸物我覺得明將(沙田)做得好出色! 炸蝦尤其!! 明將唔係咁差. 如果真係咁差咁恐怖. 幾平都唔會多人幫親到分店咁多間!!

puiyee 說...

趁呢期食開劣食抵抗力比較好,我地應該快D執行第二次任務!

自由行 說...

btw成篇野都寫得好好笑。X 2

果然係心口有個勇字, 辛苦晒你地!

妙妙 說...

我對於你呢篇blog完全身同感受呀!!
話說N年前我被朋友既極力推介(!)下去左光顧灣仔店
點知一入去已經覺得好唔掂
環境污糟,杯碟檯痴立立不在話下
小女子完全懷疑該店為省電費而將燈光較到奇暗
Umm....或者佢地想營造一個浪漫既環境啦!
果條所謂既迴轉帶等極都無野食轉到黎
終於等到....我真係見個樣都唔敢/想食囉!
三文魚同舊飯係完全分晒體
感覺就有如被人拎落黎搞完一轉再放返上去 = ="
記憶所及,我食左唔夠三件已經投降
當時價錢係幾多就真係唔記得喇!
只記得我一邊硬食一邊同身邊朋友講:「唔使錢我都唔會黎囉!!」
反而最令我大惑不解既係點解時至今日
呢間無質素又恐怖既舖頭唔執得之餘仲可以有人排隊架囉!!!?

匿名 說...

素顏小姐揀啱舖啦
西九龍分店是明將各分店中最「強」的

Ting

匿名 說...

蟹棒壽司那張相中, 左下角碟上是不是有隻小昆蟲????
好恐怖...

Sa

ki fung 說...

係喎 八爪魚丸洗唔洗另加錢 點解我上次去

劣食見唔到既??

素顏天使™ 說...

ki fung > 八爪魚丸唔洗加錢o架。

ki fung 說...

我不久之前食過,發現明將有好多比較

貴既壽司,例如鰻魚同三文魚都唔會拎

出黎轉,好唔方便=.=

話說呢家真係仲有紅豆壽司咩,上次去唔多

覺眼,不能敢死劣食^^

如是我聞 說...

你其實你所講其它深水埗著名食肆都係名過其實 維記啲豬潤有時唔多靚苦苦哋 坤記白糖糕又係酸酸哋 個師傅夠膽死講市面上九成九唔掂 佢咪又係咁http://hk.apple.nextmedia.com/template/apple_sub/art_main.php?iss_id=20060301&sec_id=12187363&art_id=5695186

素顏天使™ 說...

如是我聞 > 明將都有打手??

維記豬潤麵 so far 我食過 N 次無一次豬潤係苦喎,坤記白糖糕你咁都嫌酸,咁咪食芝麻糕囉,我覺得佢地芝麻糕好好食。